Риете ли праз по терасите, бавчите, дворовите, саксиите со фикус, и секаде каде што ќе налетате на почва, о народе, со векови потиснат? Ако кокичињата се предвесници на пролетта, тогаш празот е предвесник на туршијата и сигнал дека пред нас претстои исклучително захтевна сезона во која црниот дроб полека, но сигурно го облекува своето нуркачко одело.
Кога станува збор за комбинирање со месо, прво нешто на што нè асоцира празот е свинското (види: Дедо Праз). Но дали знаете дека одлично оди и со пилешко? Како би дознале, овој пат спремам пита со фило кори, праз и пилешко, една зимско-рустична убавица. Во последно време се стремам да не правам планина од садови додека готвам и да ја завршам работата со минимален број на прибор. Овој рецепт е токму таков - со еден сад добивате кулинарски мелем. Ова не е официјален рецепт, туку моја моментална инспирација. Затворив очи, си го замислив, ми имаше логика и ете го.
А за вие да не мора да си замислувате, скролнете надолу:
Во сад сместуваме 600 грама стекови. Покрај нив редиме малку свеж магдонос и власец, половина лимон, еден кромид и неколку чешниња лук. Додаваме и 20-тина зрна бел бибер. Месото го прелеваме со вода, додаваме сол и вклучуваме рингла на јако. Откако водата ќе почне да врие ја намалуваме ринглата на среден оган и вариме 20-25 минути. Потоа го оставаме пилешкото да се олади едно едно 7-8 минути и со 2 виљушки го раскомбосуваме на конци и мали парченца.
Додека пилешкото се вареше: на даска за сецкање, на ситни парченца сецкаме морков и праз. Водата од празот ја отстрануваме од садот и во истиот го запржуваме зеленчукот на путер, додавајќи 1 ипол лажица брашно. По 5-6 минути додаваме 200 мл. Бело вино и 350-400 мл врела вода во која има растворена пилешка коцка. Ова го оставаме да крчка на среден оган едно 12 минути, додека течностите не се редуцираат и згуснат.
Потоа го додаваме полешкото, го мешаме со остатокот од елементите и на крај додаваме 150 мл крем фрел или крема за готвење.
Откако смесата ни е повеќе густа него течна, додаваме магдонос и 2 лажици сенф.
Површината на садот ја покриваме со фило кори врз кој нанесуваме малку зејтин и многу сусам.
Ја праќаме во рерна едно 15-20 минути на 200 степени, или додека корите не станат кафеави. Оставаме 25-20 минути да олади и… јас морам да бидам искрен дека јадев неолитски - директно од тепсијата.
Вие можете да бидете троа покултурни и да распоредите по чинии. Како и да ја конзумирате, вкусот е неодолив.
На здравје!
Кирил Стоименов - пита, за да не скита
