Едноставноста е комплексна работа. Понекогаш на прв поглед може да изгледа сиромашна, а всушност е најзаситената форма на богатство што човек може да ја приушти. Токму затоа што ја елиминира целата бучава. Ја одзема потребата да покажеш. Ја одзема онаа вечна човечка навика да додаваш, да надоградуваш, да преувеличуваш. На крај останува само суштината - суровото јадро без украси и без театар.
Во едноставноста има некаква античка мудрост: работите стануваат појасни кога ќе им отстраниш сè што не им е вишок. Исто како во вајарството – Микеланџело велеше дека статуата веќе постои во мермерот, а неговата задача е само да го отстрани вишокот. Така е и во кујната. Вистинскиот вкус не се создава нужно со додавање, туку со внимателно воздржување.
Овој мал рецепт - компир, сос, рокула, сардини - е токму такво дело на кулинарна редукција. Компирот станува платформа, сосот дава акцент, руколата свеж здив, а рибата крунисува. Ништо не е излишно, ништо не натежнува, ниедна намирница не се труди да доминира. Сè е фино распоредено во некаква аполоновска рамнотежа. Едноставноста тука не е избор донесен од мрзливост, туку од зрелост. Човек сфаќа дека не му треба да го убедува светот во својата креативност, туку дека доволно е да си дозволи тивка префинетост. И во таа тишина, вкусот станува појасен, речиси прозрачен.
Одиме.
Намирници:
– Компири
– Маслиново масло
– Сол, бибер, црвен пипер, италијански микс зачини (сушени магдонос, власец, босилек, оригано)
– Мајонез
– Сенф
– Рукола
– Сардини
– Капари
– Марула
Постапка:
1. Исечи ги компирите по должина. Постави ги на хартија за печење, намачкај ги со маслиново масло и посипи ги со зачини. Печи на 200°C околу 40 минути, додека површината не стане златно-крцскава.
2. На малку изладените компири ставете тенок слој мајонез, а врз него сенф. Оваа комбинација создава секси контраст.
3. Неколку листови рукола се доволни за да му дадат длабочина на вкусот.
4. Додај мали парчиња сардина, природно распаднати.
5. Неколку капари, неколку листови марула, можеби капка лимон…
Ова јадење не се ни малку обидува да те импресионира. Токму во таа ненаметлива јаснотија лежи неговата вистинска убавина.
Кирил Стоименов - едноставист
