Или ние немаме видено или стварно нема нервозен дрводелец. Ако случајно сме во право и сме уденале дека ова второво е точно, тогаш со подеднакво издржана логика заклучуваме дека мирот им следува по основа на тоа што произведуваат нешто со сопствени раце, и тоа што никој не му се качува на глава на човек со секира во рака. Без разлика колку е ова неточно, едно крајно зен видео за целиот процес на правење стол сред шума. Цел, од стебло до столица.

Инстант сок од портокал, стисни копче добиваш инстант забава, вртиш седум броеви и имаш инстант комуникација, сврти клуч стисни педала и имаш инстант превоз... Или на кратко, нема време во историјата кога старите не кенкале како на младите им е полесен во животот.

АТАКА е една крајно забавна ултра десничарска партија која редовно промовира крајно закрепостени идеи на редовни ултра-десничарски теми. И најголемиот дел од паниката што се крева кај нас околу тоа кој во Бугарија што рекол за Македонија, се однесува на изјави кои доаѓаат од АТАКА. Инаку, сама по себе, партијата во Бугарија е смешка.

Како и секоја добра вестерн приказна и оваа почнува со пиштолџија кој влегува во салун, и понатаму нараторот гледа да ја расипе со секој следен збор.

Малку зборува, малку фаќа гитара да засвири, пуши и мрмори. Се што треба да има едно мераклиско интервју со Кит Ричардс во кое баобабот објаснува како дедо му го мамел со гитарата која висела на ѕид, кој му покажувал финти и како му изгледа омилениот штим со пет жици.

Смртта, најужасното од сите зла, никако не се однесува на нас, бидејќи сè додека постоиме, смртта не е со нас; а кога смртта ќе дојде, тогаш ние не постоиме. Оттаму, таа не е грижа ниту за живите ниту за мртвите, бидејќи за првите таа не постои, а вторите веќе ги нема. - Епикур.

Улиците во главниот виетнамски град се една непрегледна река од автомобили, скутери и автобуси. Видејќи нема шанси да дочекаш луфта во таа низа, едноставно тргнуваш по пешачкиот. И се надеваш дека нема наш човек зад волан.

Во потег без преседан, цел маратон и цели припреми за него една жена ги има завршено без за тоа да му спомне на секое можно човечко суштество што го познава.

Она што некогаш е тешко да постигнеш кај наш водоводџија, бербер или новинар. Да те фасцинира со она што одбрал да го работи, а не со мудрувањето на теми од општа пракса. Мал видео омаж за таквите луѓе, вистински нобеловци на секојдневието.

Без секирација, нема тука никаква дубара. Во оваа варијанта пицата ги содржи сите намирници кои ја прават неодолива: крцкаво тесто, доматен сос, кашкавал, кромид, пиперка, салама по свој избор. Единствен проблем со неа е што може да се случи да убиете некого. Ако ви побара гриз.

Знаеме дека овдешните дилеми најчесто се сведуваат на изборот змија или магаре, но, англиската љубопитност оди во друг правец. Спојлер: нема секс ама трае долго.

Од светот на најмладите ни доаѓа искра надеж дека не е сè отидено бестрага и дека и со нив еден ден ќе може човечки да се седне и да се подели трпеза. Месофилното крило на сајтов (друго нема) препорачува ова да се препее на македонски и да се изведува на секој училишен патронат во земјава. 

Маркирани. Исончани. Извежбани. Дипломирани. Вработени. Тимбилдирани. Ајфонирани. Чекирани.

Кога веќе ти тргнало, зошто да се мачиш да менуваш. (Ако може Умри машки, зошто да не може и за клип?)

Има 43 години се вика Џастин Трудо и го прекина 9 годишното владеење на конзервативците во Канада. Бидејќи ништо од ова нема да го запамтите, најдовме една "деновиве пред години" слика од него, во надеж дека ќе ви остави едно "е да, оној" сеќавање.

Морничаво чиста и квалитетна снимка од дрон од воените дејствија во Сирија. Маало Џобар, Дамаск, офанзива на владините сили врз бунтовниците. Снимаат Русите. И после бегале луѓето. Како бе да не бегаат?

Не дека жените се ретки во политиката, уметноста и медиумите, ама вака би изледале сликите кога од нив би се фотошопирале сите мажи. Видеото е на британски Ел, како дел од нивната #MoreWomen кампања.

Забелешката на Џорџ Карлин е за тоа како е раскашавен американскиот јазик (а штом се случило кај нив, ќе приметите и кај нас како се пренело) најмногу со цел на самите себе да си ја олесниме совеста по различни основи.

Уметност е онаа магија што се случува меѓу авторот и публиката. Тоа ви е, како што еднаш рече господин господин Звонко Богдан, ил' се дирну ил' се не додирну. Навалете се наназад и уживајте.

Господин човек знае како да го искористи својот среден прст за да си го направи меракот.

Германски Шпигел има 80 проверувачи на податоци кај кои завршуваат сите текстови што треба да бидат објавени во магазинот. Ова е текстот откако ќе заврши проверката и ќе им го вратат назад на новинарите.

Знаете ли што е најдоброто во тоа да се има другар кој може на својата глава да балансира јајце? Тоа што ќе можеш да го испратиш до дома само за да слушнеш како на жена му ѝ го вика легендарното: Што и да ти кажам, нема да ти се верува.  

Човек никогаш не би поверувал дека видео снимка од поправка на една шахта може да го трогне. Толку љубов, знаење и педантност, како да репарираат слика од Да Винчи! После ова, ќе ви дојде да отидете до првата шахта во вашето место и да се изнаплачете заедно со неа.

Ако случајно не ви успее она со постирањето на пораката за заштита на вашата приватност на ФБ, тогаш Џон Оливер ви нуди еднa подеднакво успешнa опција. Ако и ова не успее, секогаш на располагање имате едно сè уште експериментално решение што може да го пробате - ако нешто е премногу приватно за Фејсбук, не го ставајте на Фејсбук.