Offside › Набрзинка

Почнува најбогатата втора лига на свет, ќе има и стадион со 62.500 гледачи

14 August 2026

Со натпреварот Вулверхемптон - Блекбурн (21:00) вечерва почнува новата сезона во најсилната и најбогатата втора лига на светот - англиски Чемпионшип.
Од Премиер лига во Чемпионшип испаднаа Вест Хем, Барнли и Вулверхемптон кои ќе пробаат експресно да се вратат. Од Лига 1 (трета лига) во втора влегоа Линколн Сити, Кардиф и Болтон а во трета лига од Чемпионшип испаднаа Оксфорд, Лестер и Шефилд Венздеј. Во Премиер лига се пласираа Ковентри и Ипсвич како прв и втор и Хал кој стигна до огромен успех преку баражот.
Стадионот на Вест Хем може да прими најмногу гледачи во најбогатата втора лига на свет, точно 62.500. „Риверсајд“ на Мидлзброу собира 34.712 гледачи а најмало стадионче има Рексам со 10.771 седечки места.
Ова ќе биде 35-та сезона како што ќе се игра во формат од 24 екипи во 46 кола. Новост е повеќе клубови во баражот.
Суштински, ќе се игра како и досега: првиот и вториот на крајот ќе одат директно во Премиер лига. Во баражот досега играа третиот, четвртиот, петиот и шестиот тим на табела кои се бореа преку полуфинале и финале а сега на таа група ќе им се придружат и екипите на седмо и осмо место.
Третиот и четвртиот на крајот ќе играат во полуфинале на бараж, петтиот ќе игра против осмиот, а шестиот со седмиот и победниците од тие два меча ќе играат против победникот од третиот и четвртиот тим на табела во полуфинале.

извор

Хулиан Алварез си легнал на брашното

14 August 2026

После неколку месечни превирања со управата на Атлетико Мадрид која одбива да го продаде Аргентинецот во Барселона, Хулиан Алварез долго време одбивал да се појави на тренинг, да дојде во клупската база и се спротивставувал на стручниот штаб и управата.
Откако сфатил дека ниту веројатно Барселона има доволно средства да го реализира трансферот и дека Атлетико Мадрид неколку пати му укажувал на грешката на Антоан Гризман кој исто запнуваше по секоја цена да оди во Барселона и отиде, па се врати и се извинуваше, Хулиан Алварез им се исповедал на соиграчите.
Новинарот Мигел Мартин Талавера во емисијата „Ел Ларгуеро“ рекол дека напаѓачот „веќе не крие од своите соиграчи во соблекувална дека направил грешка како се однесувал со интересот на Барселона и дека неговата посветеност кон Атлетико е над сè“,
Останува да се види како ќе реагираат управата, Диего Симеоне и навивачите на Атлети.

извор

Документарецот за Дарко Панчев „Патот на Кобрата до ѕвездите“ доби нова награда

14 August 2026

Филмовите „Патот на Кобрата до ѕвездите“, во режија на Радован Максимовиќ – Макса од Белград, Србија, направен за легендарниот фудбалер Дарко Панчев, и “Булеварот на Ивица Осим“ (режисер Мухамед Бикиќ од Сараево, Босна и Херцеговина) ја добија “Гранд При“ наградата “Драган Пантелиќ – Панта“ за најдобар спортски филм на престижниот шести Меѓународен фестивал за документарни филмови, “Сити Фест 2026“.
Овој мошне квалитетен филмски фестивал се одржа под Покровителство на Општина Нишка Бања, од 7 до 9 август во Нишка Бања, крај Ниш, во Србија.
Филмот „Патот на Кобрата до ѕвездите“ е во копродукција на три врвни, повеќедецениски специјализирани спортски, медиуми од регионов – продукциската куќа “Спортнетворк НС“ од Србија која го реализираше филмот, потоа регионалната телевизија “ТВ Спорт Клуб“ од Србија и единственото (од трите специјализирани спортски радија кои беа на просторите на поранешна СФРЈ ) “Спортско радио 90,3 ФМ“ од Скопје Македонија – под генерално покровителство на “Универзитет Скопје“ на чело со Ректорот проф. д-р Г-дин Аце Миленковски.
Голема помош за документарецот даде и стручниот консултант, колегата спортскиот новинар, Живко Здравкоски, кој четврта деценија е спортски дописник од Македонија вклучително и за два од трите најстари активни печатени спортски весници во светот.
Во име на продукциската куќа “Спортнетворк НС“ од Србија, наградава “на Сити Фест 2026“, на подиумот, ја прими Г-дин Александар Станковиќ, сценарист и автор на филмов за Дарко Панчев.
„Ви пренесувам поздрав од Дарко Панчев, кој е емотивно поврзан за Ниш бидејќи овде не само што сјајно играше во дресовите на Вардар и Црвена Звезда против Раднички, туку и ги мина војничките денови, така што Ниш го смета за свој втор дом“, рече, помеѓу другото, Александар Станковиќ.

извор