- Основниот Кривичен суд Скопје го ослободи од обвинение поранешниот премиер Никола Груевски за случајот „Талир 2“, за пречекорување на службени овластувања и противправно финансирање на изградбата на партиското седиште на ВМРО-ДПМНЕ.
- Судијката Даниела Алексовска објасни дека ослободителната пресуда е директна последица на законските измени од 2023 година, а не на различна оценка на доказите.
- Според Судот, иако претходно истите докази биле доволни за да се утврди злоупотреба на службената положба, по законските измени тие не биле доволни за да се докаже кривичното дело пречекорување на службените овластувања.
- Трошоците за судската постапка паѓаат на Буџетот на државата. Судот го одби и предлогот на Обвинителството за конфискација на седиштето на ВМРО-ДПМНЕ.
- Предметот „Талир 2“ повторно беше отворен по одлуката на Апелацискиот суд од јануари 2024 година, кога првостепената пресуда беше укината поради измените на Кривичниот законик. Во првото судење во 2022 година Груевски беше неправосилно осуден на 6 години затвор, но постапката беше вратена на повторно судење.
- Американски федерален суд пресуди дека има основа за покренување тужби против фармацевтската компанија Кенвју во врска со тврдењата дека нејзиниот лек против болки Тиленол може да предизвика аутизам.
- Окружниот апелационен суд во Њујорк објави дека судијата од понискиот суд немал основа да го исклучи сведочењето на Андреа Бакарели, декан на факултетот за јавно здравје на Универзитетот Харвард, бидејќи наводно не одразувал сигурна примена на научни методи.
- „Ова е оправдување за научните докази што нашите клиенти ги презентираа од почетокот. Со нетрпение очекуваме да ги презентираме тие докази пред поротата“, изјави Ешли Келер, адвокат што застапува група тужители.
- Претседателот Доналд Трамп лани им советуваше на бремените жени да не го користат лекот против болки. Обвинителот на Тексас поднесе тужба.
- Ризиците од Тиленол ги открил првичниот производител Johnson & Johnson, но избегнал да објави предупредување на пакувањето, туку го издвоил своето Одделение за здравје на потрошувачите во нова компанија Кенвју, со што практично ѝ ја префрлил и одговорноста.
- Државниот секретар Марко Рубио повика на расформирање на Меѓународниот кривичен суд, за кој тврди дека се меша во воените и полициските операции на САД.
- Во колумна во Њујорк тајмс тој ги повика сите земји што добиваат поддршка од САД да му ја откажат поддршката на МКС. Во спротивно, може да бидат под засилен американски надзор и ќе се соочат со забрани за патувања, поништување визи и други санкции.
- „Мешањето на Меѓународниот кривичен суд во американските воени и полициски операции не претставува само сериозно пречекорување на неговите наводни овластувања. Тоа би значело крај за САД како суверена и независна нација. Нашите одлуки и нашиот народ би биле препуштени на милост и немилост на МКС и неговите соработници во „меѓународната заедница“. Да се прифати МКС значи да се откажеме од контролата врз нашата национална судбина“, истакна Рубио.
- Трамп уште лани воведе санкции против судии од МКС, главниот обвинител Карим Кан и специјалната известувачка на ОНа Франческа Албанезе, откако судот објави меѓународни потерници по израелскиот премиер Бенјамин Нетанјаху и министерот Јоав Галант во врска со воени злосторства во Газа.
- Се шпекулира дека администрацијата на Трамп може да го санкционира трибуналот како целина. Тоа значи дека на Американците нема да им биде дозволено да работат со МКС, а лицата, банките или компаниите што соработуваат со судот би се соочиле со парични или затворски казни.
