Првата дама на САД во снимена видео порака до јавноста објави дека немала воспоставено никакви односи со Џефри Епстин, не била негова жртва и не знаела за неговиот синџир за проституција.
„Мора да запрат лажните клевети за мене од злобни и политички мотивирани поединци и субјекти, кои сакаат да предизвикаат штета на моето име за лична финансиска и политичка корист... Јас не сум жртва на Епстин. Епстин не ме запозна со Доналд Трамп“, изјави Меланија Трамп. Таа додаде дека првпат се сретнала со Епстин во 2000 година, на на настан на кој присуствувала со Доналд Трамп.
Порталот Дејли бист лани беше принуден да повлече сторија во која авторот Мајкл Волф тврдеше дека Епстин ја запознал Меланија со Доналд Трамп и јавно се извини за „за каква било конфузија или недоразбирање“.
Меланија Трамп се појави во објавените документи од досието Епстин во имејл што го испратила до неговата соработничка Гислен Максвел, кој ги потпишала со: „Со љубов, Меланија“. Тоа поттикна гласини за нејзините врски со Епстин, од кои досега ја бранеше нејзиниот правен тим. Првата дама изјави дека тоа било „обична преписка“ со „тривијална забелешка“.
Американската јавност само нагаѓа што ја поттикнало Меланија Трамп во едно од ретките обраќања до јавноста да се наврати на темата за Епстин која падна во втор план откако почна војната против Иран. „Првата дама проговори затоа што ѝ е доста. Лагите мора да запрат“, изјави нејзиниот советник Марк Бекман.
Одборот за мир на Доналд Трамп добил само мал дел од 17-те милијарди долари ветени за обнова на Газа.
Од десет земји кои ветија средства, платиле само Обединетите Арапски Емирати, Мароко и САД. Собраната сума е под 1 милијарда долари – помалку од членарината за секоја земја што ја најави Трамп.
За реконструкција на Газа, каде што четири петтини од зградите беа уништени во двегодишните израелски бомбардирања, ќе бидат потребни околу 70 милијарди долари. според проекциите на глобалните институции.
Поради проблемите со финансирањето, новоформираниот Национален комитет за администрација на Газа (NCAG), не може да ја преземе контролата врз регионот од Хамас. Според мировниот план, Комитетот на чело со Али Шаат Хамас треба да ги управува министерствата и полициските сили.
Четворицата астронаути на НАСА утрово безбедно се спуштија на Земјата, по десетдневната мисија Артемис 2 околу Месечината.
Нивната капсула „Орион“ ги издржа огромните температури од брзото навлегување во земјината атмосфера и се спушти со падобран во Пацификот, покрај брегот на Калифорнија.
„Стабилни сме“, објави командантот на мисијата Рид Вајзман. Тој и другите астронаути – Виктор Гловер, Кристина Кох и Канаѓанецот Џереми Хансен, ќе поминат низ неколкудневни детални медицински прегледи.
При влегувањето во атмосферата, екипажот леташе 32 пати побрзо од звукот (побрзо од кој било човек досега), а нивната капсула беше изложена на температура од 2.760 Целзиусови степени – практично беше обвиткана во оган, поради што во критични 6 минути немало никаков контакт со Контролата на мисијата. Падобраните ја намалиле брзината на слободниот пад на 25 километри на час.
При мисијата за обиколување на Месечината, екипажот на НАСА стаса 406.778 километри од Земјата, подалеку од кој било човек досега, и направи детални снимки од нејзината „скриена“ страна.
НАСА в година ќе ја спроведе мисијата Артемис 3, во која ќе тестира екипаж со лендери во орбита, како конечна подготовка за мисијата Артемис 4, кое опфаќа спуштање астронаути на Месечината, прв пат по 1972 година. Во трка е со Кина, која планира да испрати свои „таиконаути“ на Месечината до 2030 година.
