- Белата куќа работи на план да казни некои партнери од Алијансата за кои претседателот Трамп смета дека не им помогнале на САД и Израел за време на војната со Иран.
- Планот е во рана фаза, но според Волстрит журнал, казната би била повлекување на американските трупи од овие земји. САД имаат стационирани околу 84.000 војници низ Европа и базите обезбедуваат економска поддршка за земјите-домаќини преку инвестиции.
- „НАТО не беше таму кога ни требаа и нема да бидат таму ако повторно ни требаат“, порача синоќа Трамп на TruthSocial. Тој притоа го спомна Гренланд, кој сака да го присвои од Данска заради стратегиска безбедност на САД: „Се сеќавате на Гренланд, тоа големо, лошо управувано парче мраз?“.
- Прва на удар е Шпанија - единствената земја на НАТО што не прифати да троши 5% од својот БДП за одбрана и забрани американски авиони вклучени во операцијата во Иран да го користат нејзиниот воздушен простор. Италија накратко им го блокираше на САД користењето на воздухопловната база на Сицилија, а Париз им дозволи на Американците да користат база во јужниот дел на Франција само за авиони што не се вклучени во војната против Иран.
- За главни поддржувачи, САД ги сметаат Полска, Романија, Литванија и Грција.
- На средбата зад затворени врати со генералниот секретар Марк Руте, Трамп отстапил од заканата за повлекување на САД од НАТО. За такво нешто потребна е одлука од Конгресот.
- Четворицата астронаути на НАСА утрово безбедно се спуштија на Земјата, по десетдневната мисија Артемис 2 околу Месечината.
- Нивната капсула „Орион“ ги издржа огромните температури од брзото навлегување во земјината атмосфера и се спушти со падобран во Пацификот, покрај брегот на Калифорнија.
- „Стабилни сме“, објави командантот на мисијата Рид Вајзман. Тој и другите астронаути – Виктор Гловер, Кристина Кох и Канаѓанецот Џереми Хансен, ќе поминат низ неколкудневни детални медицински прегледи.
- При влегувањето во атмосферата, екипажот леташе 32 пати побрзо од звукот (побрзо од кој било човек досега), а нивната капсула беше изложена на температура од 2.760 Целзиусови степени – практично беше обвиткана во оган, поради што во критични 6 минути немало никаков контакт со Контролата на мисијата. Падобраните ја намалиле брзината на слободниот пад на 25 километри на час.
- При мисијата за обиколување на Месечината, екипажот на НАСА стаса 406.778 километри од Земјата, подалеку од кој било човек досега, и направи детални снимки од нејзината „скриена“ страна.
- НАСА в година ќе ја спроведе мисијата Артемис 3, во која ќе тестира екипаж со лендери во орбита, како конечна подготовка за мисијата Артемис 4, кое опфаќа спуштање астронаути на Месечината, прв пат по 1972 година. Во трка е со Кина, која планира да испрати свои „таиконаути“ на Месечината до 2030 година.
- Новиот европски систем за влез и излез (EES – Entry/Exit System) во земјите од Шенгенската зона создаде километарски колони на границите на Хрватска со Србија и Босна и Херцеговина.
- ЕЕС почна да се применува од ноќеска на полноќ. За државјаните од земјите од Шенгенската зона нема никакви промени, но од оние од третите земји на границата задолжително се земаат биометриски податоци и дигитално се внесуваат во база на податоци, наместо да се удираат печати во пасошите.
- Колоните за влез во Хрватска биле дополнително зголемени поради продолжениот викенд и велигденските празници во Србија.
- На граничниот премин Бајаково биле формирани пет километарски колони од возила, во кои патниците за влез во Хрватска чекале по два часа.
- На граничните премини кон Босна и Херцеговина се чекало по најмалку еден час.
