- Пентагон запре испорака на противвоздушни проектили и друга прецизна муниција за Украина поради загриженост дека американските залихи се при крај.
- Новата администрација на САД главно се придржува до воената помош што ја одобри поранешниот претседател Џо Бајден, со кратки паузи во испораките во февруари и во март. Украина досега добила американско оружје и друга воена помош во вредност од 66 милијарди долари.
- „Целта на оваа одлука е првично да се штитат интересите на Америка, по прегледот на нашата воена помош и поддршка за други земји низ светот. Воената моќ на оружените сили на САД не е загрозена. Прашајте го Иран“, изјави претставничката на Белата куќа, Ана Кели.
- Доналд Трамп по средбата со Володимир Зеленски на самитот на НАТО ја остави отворена можноста за испорака на противвоздушни системи Патриот на Украина. „Тие сакаат Патриоти и ние ќе видиме дали имаме на располагање. И на нас ни се потребни. Му ги даваме на Израел и многу се ефикасни, 100%. Ги сакаат повеќе од било што друго“, изјави Трамп.
- Претставничкиот дом на САД го усвои „Големиот убав закон“ на Доналд Трамп за буџетот и трошоците. Претседателот утре свечено ќе го потпише на Денот на независноста.
- Иако многумина републикански конгресмени го критикуваа, само двајца гласаа против. Конечниот резултат беше 218-214.
- Законот од 940 страници се однесува на речиси сè, од здравствената и социјалната заштита, до купони за храна и чиста енергија. Канцеларијата за буџет на Конгресот проценува дека во следните десет години законот ќе го зголеми федералниот дефицит од 3.300 милијарди долари. Алтернативна пресметка вели дека ќе го намали дефицитот за 500 милијарди.
- Корисниците на здравствената програма Медикејд ќе мора да докажат дека работат за да исполнат услови за поддршка. Даночните олеснувања за компаниите за енергија од обновливи извори фазно ќе бидат намалени и ќе бидат укинати во 2028 година. Ќе се намали оданочувањето на бакшиши, прекувремена работа и кредити за автомобили...
- Проценката е дека најбогатите домаќинства годишно ќе добијат олеснување од 12.000 долари годишно, а најсиромашните по 1.600 долари.
- Данска побара од ЕУ да го употреби „сиот легален арсенал“ мерки против Унгарија, вклучувајќи и одземање на правото на глас, поради нарушување на основните права на Унијата.
- „Сè уште сме сведоци на прекршување на основните вредности. Затоа ќе ги продолжиме процедурата од Членот 7 и сослушувањата на Унгарија“, изјави министерката за европски работи на Данска, Мари Бјере.
- Членот 7 во ЕУ важи за „нуклеарна“ опција. Овозможува одземање на правото на глас на некоја членка како казна ако не се придржува до правилата. Унијата досега не го користела, наспроти постојаните обвинувања на сметка на Будимпешта.
- Данска, која од 1 јули го презеде претседавањето со ЕУ, ја обвинува Унгарија и за блокирањето на евроинтеграцискиот процес на Украина.
- Дипломати во Брисел тврдат дека заканите од Данска нема да може да се спроведат без политичка поддршка од Берлин и од Париз, која засега ја нема.
