Се верува дека традицијата на вивандиерките (vivandières) започнала некаде во раниот 18 век во рамки на француската армија. Тоа биле жени кои се придружувале на воените сили за да помагаат во сето она во што можеле, како готвење подобра храна отколку што можела да понуди војската или продавање вино на трупите. Понекогаш цивилите ги сметале за проститутки или ги гледале онака како што обично се гледа на девојки што ги следат во чекор омилените музичари кога се на турнеја. Но повеќето од нив всушност биле мажени или во некаква врска со војниците во конкретната единица. Ова се поклопува со известувањата дека и пред 18-тиот век армиите понекогаш со себе имале повеќе жени и деца отколку војници .
Француската армија била прва која им доделила јасна категорија на жените-придружнички и улога во текот на Француската револуција. Ти освен вино продавале и тутун, хартија за пишување, пудра за перики и други производи за трупите кои припаѓале на специјална група привилегирани мажи-војници. Ваквиот „бизнис“ имал позитивен ефект врз дисциплината во камповите, бидејќи војниците немале потреба да трагаат по нештата што им требаат и евентуално да им падне на памет да дезертираат.
Имало и мажи кои се занимавале со ваква продажба, но ним им била дадена дозвола да се женат и да ги пренесат овластувањата и на сопругите. За жал, не постои богата историска документација за овие жени, но затоа има уметнички визуелни прикази на истите. Иако улогата им била потценета, нивната воена униформа сугерира дека било поинаку. Феминизираната верзија на воената униформа ја акцентирала важноста на нивната улога. Истовремено, кога имало паради во време на мир, тие знаеле да ја водат единицата, сугерирајќи дека биле нејзини ценети членови. Носењето пантолани за нив било нормализирано многу пред тоа да важи и за другите жени.
Присуството на вивандиерките во француската армија се забележува од раните 1700-ти до Првата светска војна. Но „имитации“ имало и во други контексти, на пример во текот на Американската граѓанска војна, во Шпанија, Италија, Белгија, Германија. Ликови инспирирани од нивните се појавуваат во операта и театарот во овие земји.
