На претоплата писта авионскиот екипаж нема многу избор освен да го пушти климатизерот за и тие и патниците да можат да дишат. Но наскоро ова може да се промени, благодарејќи на нова ултра-бела боја која може да одбие 97,9% од сончевата светлина.
Бојата има потенцијал да ги лади екстериерите на авионите, автомобилите, возовите па дури и на вселенските летала. Како што планетата се затоплува поради климатските промени, таа може да биде иновативен, пасивен начин на ладење на простории и луѓе. Истовремено, ова може да помогне за намалување на нашата зависност од високата потрошувачка на струја за климатизери, кои дополнително придонесуваат кон затоплувањето на планетата.
Бојата е подобрување на претходно постоечка формула, која била премногу густа и можела да се нанесува само на неподвижни структури. Сега истражувачите велат дека ја рафинирале во ултра-ретка супстанца која е безбедна за нанесување на возила. Наодите се објавени оваа недела во списанието Cell Reports Physical Science.
За споредба, комерцијално достапните бои на пазарот денес можат да рефлектираат 80-90% сончева светлина, што значи дека апсорбираат повеќе светлина и топлина. Ултра-белата ги лади површините преку емитирање повеќе топлина отколку што задржува, без притоа да користи електрична енергија како другите апарати за ладење.
