Приказната за мимозата започнува многу пред Хичкок да го популаризира овој пијалок. Во 1921 година, во лондонскиот клуб Бак, еден шанкер направил пијалак од две дози шампањ и една сок од портокал, познат како Бакс физ. Четири години подоцна, шанкерот Франк Мајер во парискиот хотел Риц малку ја променил комбинацијата, користејќи еднакви количества пенливо вино и цитрусен сок. Токму оваа верзија го добила името мимоза.
Во првите децении мимозата главно се сметала за европски луксуз, поврзан со аристократијата, раскошните хотели и познатите гости. Но потоа на сцената се појавил Хичкок. Неговата јавна наклонетост кон пијалакот била добро позната, а американскиот свет на храна и пијалаци подоцна му припишувал важна улога во нејзината популаризација. Во една статија од 1966 година, на пример, Хичкок бил опишан како расположен и во добра форма, со мимоза во раката и огромна пура.
Така, пијалакот постепено добил нова улога. Во американската култура пенливото вино долго било поврзувано со вечерни прослави, свадби и новогодишни наздравувања. Со додавањето сок од портокал, станало полесно да се замисли како утрински пијалак. Мимозата така се вклопила во новата култура на доцниот појадок, односно бранчот, каде што чашата со пенлив пијалак пред пладне повеќе не изгледала како нешто необично, туку како знак на опуштен и малку раскошен животен стил.
