Bookbox › Набрзинка

Чуму слобода?: фестивал Букстар од 28-30 септември во Скопје

23 септември 2026

Од 28-30 септември на повеќе локации во Скопје ќе се одржи 12-тото издание на фестивалот Букстар. Тој оваа година го отвора прашањето ЧУМУ СЛОБОДА? односно FREE AT LеAST?, инспирирано од зборовите на Мартин Лутер Кинг Јуниор: „Никој не е слободен сè дури сите не сме слободни“. Во време кога границите – видливи и невидливи – повторно се појавуваат околу нас, книжевноста останува простор во кој БАРЕМ мислата може да се движи без ограничувања, велат организаторите од издавачката куќа „Антолог“.
На 28 септември од 18:30 во Лабораториум ќе се одвива разговор со неколку македонски писатели со модераторката Фросина Пармаковска на тема „Од робот до четбот: дискусија за ерата што доаѓа“.
На 30 септември во Europe House во Скопје, со почеток од 16 часот ќе се одржи мал омаж во кој уредници на четири издавачки куќи и познавачи на творештвото на неодамна починатата иранска авторка Марџан Сатрапи ќе се осврнат на нејзиното творештво, а модератор ќе биде Ивица Дукоски. Истата вечер од 19 часот е предвиден разговор со Ѓузел Јахина, авторка на „Зулехја ги отвора очите: патување во еден книжевен универзум“.
Помеѓу гостите на фестивалот е и најчитаниот шпански автор Елој Морено. Во 2025 година, заедно со илустраторот Давид Сиера, тој ја објави „Новото патување на Малиот принц“, продолжение на „Малиот принц“. Покрај тоа, шпанскиот автор на 8 февруари 2025 година го собори Гинисовиот светски рекорд за најмногу потпишани книги во 12 часа, со неверојатни 11.088 потпишани книги.

Целосната програма и списокот на учесници се достапни на социјалните мрежи на Антолог.

извор

„Фикции“ на Игор Тошевски во Јадро

21 септември 2026

Културно-социјалниот простор „Центар-Јадро“ во Скопје на 22 септември (вторник) во 20:00 часот, ја отвора самостојната изложба на македонскиот уметник Игор Тошевски насловена како „Фикции“. Преку неа тој претставувајќи авторски концепт кој директно ја преиспитува врската меѓу илузијата и секојдневната општествена реалност.
Поставката гради мост помеѓу естетиката на филмскиот ноар од средината на минатиот век и современата критичка теорија, користејќи драматична типографија на платна во комбинација со таканаречени „редимејд“ предмети. Преку остри контрасти и сенки, Тошевски создава простор на неснимени филмски сцени, ставајќи го секој посетител во позиција на истражувач кој треба да ја препознае тензијата помеѓу визуелниот знак, физичкиот труд и наметнатата перцепција.
Овој уметнички проект не останува затворен во елитните академски кругови, туку преку препознатливи сцени и предмети испраќа порака за манипулацијата со информациите и вистината во јавниот простор. За домашната публика, изложбата претставува можност за соочување со начинот на кој медиумските наративи го обликуваат секојдневието, поставувајќи прашање каде завршува фикцијата, а каде започнува реалниот живот.

извор

Рулбук - ново место за друштвени игри во Скопје

21 септември 2026

Во центарот на Скопје, на ул. Мито Хаџивасилев Јасмин бр. 15 (спроти задниот влез на Мр. Џек) викендов се отвори Rulebook Café - ново место за друштвени игри.
Просторот, на два ката, е одлично уреден според стандардите за бордгејмери - масите се вдлабнати со суптилно светло, а коцките, картите и сите делови од игрите се заштитени од пијалоци и случајни удари. Дури и ужинките се дизајнирани за картите да преживеат.
Ќе бидат организирани редовни тематски вечери, месечни турнири, а отворено е и за приватни настани. Не мора да дојдеш со друштво - и за тоа во Рулбук велат дека е нивна работа. Овој четврток (24.09.) за почетници се објаснува и се игра Катан, како вовед во државното првенство. Сабота од 12 е ден за семејно дружење. Сите резервации се прават преку сајтот, на линкот.

извор