„М: син на векот“ е мини-серија базирана на истоимениот историски роман-бестселер на Антонио Скурати. Обете пак вклучуваат историски документи, говори и преписки на Мусолини од 1920-1925, клучен период за подемот на фашизмот во Италија и последиците од истото во Европа и светот.
Помеѓу ликовите има и еден необичен, Јапонец когошто Мусолини го вика „другар самурај“, а за кого е лесно да се помисли дека е измислен поради некаков драмски ефект. Но човекот постоел, бил поет, преведувач и политички активист - некои викаат и шпион - кој живеел со години во Италија и бил промотор на италијанско-јапонската културна размена.
Харукичи Шимои, како што се викал, се родил во 1883 во градот Фукуока. Ги завршил студиите во Јапонија , а потоа се преселил во Европа за да го проучува Данте, на кого му се восхитувал. Станал професор по јапонски на Источниот универзитет во Неапол.
Во 1917 се пријавил во италијанската армија во текот на Првата светска војна и се посветил на борба против силите на Оската. Станал специјалец („ардито“) и ги подучувал војниците карате, а преведувал и при посетата на основачот на џудото, Џигоро Кано, додека овој престојувал во Италија - се смета дека на овој начин биле популаризирани овие боречки вештини во Европа.
Со оглед на тоа што поседувал дипломатски пасош и можел слободно да се движи преку државните граници, Шимои бил курир помеѓу Габриеле Д'Анунцио, тогашен регент на Фјуме. Станува збор за значаен период од историјата на Италија, кога по завршувањето на Првата светска војна и распадот на Австро-Унгарија се наметнало прашањето за територијалната поделба, во случајов помеѓу кралството Италија и кралството СХС (подоцна Југославија). Според одредбите на Лондонската спогодба од 1915, регионот на Фјуме, односно денешна Ријека, припаднал на СХС, што довело до жестоко противење на дел од италијанската јавност. Во септември 1919 во градот влегува Габриеле Д'Анунцио, поет, драмски писател, аристократ и офицер на кралската италијанска армија во текот на Првата светска војна. И покрај идеолошката блискост со Мусолини, елементи на суета и ривалство го направиле нивниот однос амбивалентен, но Д'Анунцио се смета за прото-фашист кој ја милитаризирал политиката и го поттикнувал култот на личноста, но никогаш не бил дел од Фашистичката партија.
Шимои бил, значи, близок соработник на овој човек, кој за своите искуства ја напишал книгата „Италијанскиот фронт од перспектива на еден јапонски самурај“, преведена на англиски дури во 2019. Тој е заслужен што на италијански се преведени неколку јапонски хаику поети, меѓу кои Башо, а се залагал и за изградба на храм посветен на Данте во Токио. Ова ја објаснува неговата појава во спомнатата серија, која може лесно да се прескокне ако не се чепне по историските детали.
