Државната железничка компанија на Кина во петокот се пофали дека со отворањето на новата железничка врска Сијан-Јанјан од 299 километри, вкупната должина на пруги за супербрзи возови во земјата надминала 50.000 километри. Пред пет години беше околу 27.000, а десет години пред тоа едвај 80 километри, колку да ги поврзе Пекинг и Хонг Конг со аеродромите.
Денес супербрзите возови поврзуваат 97% од сите градови во Кина со повеќе од 500.000 жители, но Пекинг објави планови за проширување на мрежата на 70.000 километри до 2035 година.
Костурот на мрежата распространета низ целата земја беа врската од 2.298 километри помеѓу Пекинг и главното пристаниште Гуангџоу, веднаш до Хонг Конг, како и линијата од 1.318 километри помеѓу најголемите градови Пекинг и Шангај, по која возовите Фуксинг се ограничени на максимална комерцијална брзина од 350 километри на час, иако можат да возат и побрзо. Од Пекинг до Гуангџоу сега се патува за помалку од осум часа, а до Пекинг за 4,5 часа.
Оперативната километража на брзата железница во Кина ја надмина вкупната должина на сите други земји. Но, патувањето со воз е повеќе од брзина и од километри. Тоа ги поврзува луѓето, регионите и иднината, објави Мин Џијан, портпарол на Министерството за надворешни работи.
Кина е во процес на тестирање на возови од следната генерација кои би можеле дополнително да го намалат времето на патување помеѓу нејзините метрополи. Кинеската академија за железнички науки во октомври објави дека прототипови на возовите CR450 при тестирање достигнале брзина од 896 километри на час на делница од брзата линија Ченгду-Шангај.
Дури и кога ќе ги поврзе сите градови во земјата, кинеските железници не планираат да запрат со изградба. Пекинг финансира железнички проекти во други азиски земји во рамките на својата иницијатива „Еден појас, еден пат“, која почна во 2013 година како современ Пат на свилата, со цел да се пробие копнен пат до Европа за транспорт на стоки, но и за ширење на своето влијание низ целиот континент.
