Сомнителна тревога:

Иран планира напад врз САД со „валкана бомба“?

Американски разузнавачи откриле конкретни планови на Иран да изврши терористички напад врз Вашингтон со хемиско оружје или со „валкана бомба“ која шири радијација. Функционери се сомневаат дека Иран воопшто има капацитет за таков напад. Тревогата се поврзува со обидите да се продолжи законот за надзор на комуникациите на странски државјани во САД.

Откриените планови се прилично конкретни и вклучуваат локации и цели, објави ЦНН, повикувајќи се на седум разузнавачки извори. Сепак, засега нема докази дека Техеран донел одлука за нивно спроведување. Аналитичари ги оценуваат како дел од стратегиското планирање на Техеран да развие различни опции за дејство во случај на ескалација на војната.

Останува отворено прашањето дали тие навистина располагаат со кадар подготвен да ги изврши таквите напади, изјави еден од изворите.

Потенцијалната закана, сепак, се сфаќа сериозно. Во изминатата недела биле одржани неколку состаноци за да се дефинираат начини како САД може да одговорат на заканата. Тајната служба минатата недела донесе одлука министерот за финансии, Скот Бесент, да биде преместен да престојува во заштитен воен објект. 

Уште во првиот мандат на Трамп разузнавачи предупредија дека Иран почнал да развива планови за атентат врз претседателот. Трамп во август во Анкара тајно беше евакуиран од претседателскиот авион „Ер форс 1“ и од самитот на НАТО се врати со воен транспортер, откако била откриена конкретна закана за напад.

Официјални лица предупредија дека САД се исклучително ранливи на напад со неконвенционално оружје. „Валканите бомби“ – во кои експлозивното полнење распрснува радиоактивен материјал, се релативно лесни за изработка. Иран не мора да уфрли свои агенти и материјал во САД, туку би можел да врбува атентатори кои веќе престојуваат во Америка. Истото важи и за напад со хемиски агенси.

Со оглед на тоа колку пропустлива беше нашата граница во поголемиот дел од изминатите десет години, би било исклучително лесно да се внесат оперативци во земјата, да набават компоненти и да изработат бомба, изјави еден од изворите блиски до разузнавачките служби.

Друг извор укажува дека агенции за безбедност претпоставуваат дека во САД со веќе со години е скриен нуклеарен материјал на соодветни локации.

Со други зборови, способноста на Иран да изведе ваков вид на напад не е зголемена. Променет е иранскиот мотив, вели изворот.

Извештајот се поврзува и со политичкиот обид во Вашингтон да се обнови контроверзниот Закон за надворешно разузнавање (FISA). Спорниот Член 702 им дозволува на разузнавачките агенции без налог да шпионираат странски државјани и во САД и во светот, заради откривање терористички и други закани за националната безбедност. Во јуни Конгресот не го продолжи законот, чии мерки остануваат на сила до март идната година.

Одложувањето на законот би ги загрозило животите на Американците во земјата, како и на нашите војници стационирани во странство, во услови на зголемена закана, предупредија јавниот обвинител Тод Бланш, директорот на националното разузнавање Џеј Клејтон и директорот на ЦИА Џон Ретклиф во заедничко писмо испратено минатата недела до републиканските и демократските лидери во двата дома на Конгресот.

******
Види и: САД останаа без моќна алатка за шпионирање

Го извлекле Трамп од „Ер форс 1“ во камионче за храна?

17 ноември 2026 - 08:39