- Конгресот на САД првпат по 2008 година не ја продолжи алатката што на разузнавачката заедница ѝ овозможуваше да шпионира странци, но и без налог да има надзор врз американски граѓани. Деветнаесет републиканци им се придружија на 199 демократи и гласаа против.
- Важноста на Законот за надворешно разузнавање (FISA) завршува денеска. Спорниот Член 702 им дозволува на разузнавачките агенции без налог да шпионираат странски државјани и во САД и во светот, заради откривање терористички и други закани за националната безбедност.
- Поради правна дупка, тоа овозможува и следење на комуникациите на сите Американци со странци – електронска пошта, пораки и разговори по телефон. Самиот Трамп се жалеше дека бил жртва на ваква злоупотреба.
- Сенаторот Рон Вајден забележа дека повеќето овластувања на FISA ќе останат во сила до март 2027 година, дури и ако програмата престане да важи. Компаниите сè уште ќе бидат законски обврзани да ги почитуваат директивите за предавање на податоци за комуникација на целите.
- Од денеска на сила стапува новиот Пакт за миграција и азил на ЕУ – пакет од десет реформи што опфаќаат построги контроли на границите, обработка на барањата за азил и депортациите и порамномерно ја распределива одговорноста за сместување на мигрантите низ земјите-членки.
- Барателите на азил од „безбедни“ земји или оние што претставуваат потенцијална закана за безбедноста се соочуваат со забрзано тримесечно време на обработка и се ограничени на една можност да поднесат жалба за одбиено барање.
- Се дава приоритет на брзо враќање на лицата кои не ги исполнуваат условите за азил, се прошируваат овластувањата за депортации и се овозможува отворање центри за репатриација.
- Новата биометриска база на податоци (Еуродак) собира отпечатоци од прсти и фотографии на лицето од сите мигранти - вклучително и деца на возраст од шест години - за да ги следи нивните движења и да спречи неовластено патување во рамките на блокот.
- Земјите што се најсилно оптоварени со миграција ќе добијат загарантирана помош од другите членки на ЕУ – да примат дел од мигрантите или да обезбедат директна финансиска поддршка.
- Трамп очекува веќе во текот на овој викенд на локација во Европа да биде потпишан „меморандум за разбирање“ што води до крај на војната со Иран. Договорот бил постигнат со посредство на Пакистан и Бахреин, бил одобрен од високи функционери во Техеран, но сè уште не од врховниот лидер Моџтаба Хамнеи.
- Содржината не е објавена, но според извори на Аксиос, опфаќа продолжување на примирјето за уште 60 дена, кое ќе важи и за сите воени акции на Израел во Либан.
- И Иран и САД ќе го деблокираат Ормускиот проток. Сообраќајот треба да се врати на нормално ниво во рок од 30 дена, без патарини, а Иран ќе може да извезува нафта во рок од 60 дена. Веројатно ќе добие пристап и до дел од милијардите што му се замрзнати во странство.
- Техеран ќе се обврзе дека нема да развива нуклеарно оружје во посебен договор, по преговори. Нуклеарниот материјал што сега го има ќе биде осиромашен под надзор на експерти од ОН.
- Церемонијата на потпишување на „Договорот од Исламабад“ би требало да се одржи во Женева. Потписници ќе бидат американскиот потпретседател Џ. Д. Венс и шефот на иранската дипломатија Абас Арагчи.
