Според анкетата на либертаријанскиот тинк-тенк Институт Като спроведена кон крајот на јуни, 86% од испитаниците рекле дека се благодарни што се Американци, а 70% веруваат дека основачките принципи на нацијата остануваат релевантни.
Сепак, речиси половина од Американците (46%) не знаат дека 250-годишнината од Америка го одбележува усвојувањето на Декларацијата за независност.
Оваа граѓанска неписменост се однесува и на основните принципи на државата и владеењето: речиси 60% не знаат дека главната цел на уставот на САД е да ја ограничи моќта на власта и не знаат зошто колониите прогласиле независност од Велика Британија.
Сондажата открива и длабока загриженост за иднината на американската слобода. Мнозинството од анкетираните веруваат дека земјата отстапила од своите основачки принципи, а повеќе од половина се плашат дека САД би можеле да престанат да бидат слободна земја во следните 50 години, наведувајќи ја корупцијата и злоупотребата на моќта како главни закани.
Мнозинството и од републиканците и од демократите ги делат овие стравови.
Загриженоста е особено изразена кај испитаниците од генерацијата З, кои покажаа и најниски нивоа на граѓанско знаење и најмалку познавања за основањето на нацијата.
„Недостатокот на граѓанско знаење е катастрофален“, вели професорот по историја и американски студии од Стенфорд, Џек Раков. „За да успее, секој демократски систем на владеење треба да се потпира на информиран електорат“.
Причината за проблемот се гледа во фрагментираниот медиумски пејзаж и образовната насока по која приоритет им се дава на STEM предметите (наука, технологија, инженерство, матемаматика) пред граѓанското образование и историјата.
