Раул Гонзалес е тренер број 1 во светот за 2017-та

Човекот кој дојде тивко, направи ракометна револуција во Македонија и го извади цело Скопје на плоштад на 4 јуни годинава, го доби признанието кое највеќе од сите го заслужуваше. Капа доле мајсторе.

Раул Гонзалес е прогласен за најдобар тренер во светот за 2017-та година. Признание кое му го доделува специјализираниот сајт за ракомет „Handball-planet“.

Популарнииот шпански стратег кој го доби прекарот „Ел Команданте“ пристигна во Скопје повеќе со тренерско искуство како помошник, но во Вардар направи бум и со освојувањето на Лигата на шампиони испиша нова ракометна историја за Македонија.

На гласањето учествуваа новинари од 30 земји од цел свет кои даваа по 3, 2 и 1 поен/глас, додека читателите на сајтот имаа можност да оставаат по 20, 15, 10, 5 и 1 глас.

Гонзалес седна на клупата на Вардар во јануари 2014-та година и со целосна доминација му донесе вкупно 10 трофеи. Три во македонската лига, четири во Купот, два во СЕХА лигата и еден во Лига на шампиони.