Општо познато е Италија ја совлада Франција во финалето на СП 2006, а Зидан имаше неславно заминување од Мундијалот откако му удри глава на Матераци. Но дали знаете дека Виали го има освоено Военото Светско првенство, а Дел Пјеро и Канаваро имале неславен меч со црвени картони?

Васко де Гама игра финале против Фламенго. Малиов им е капитен на првиве, има 10 години, не разбираме што им зборува, ама јасно е кој е тука главен во екипа и што сака да им каже. Играјте со муда за дресов.

Ако заклучиме дека пред едно 15 дена заврши Светското, а за помалку од 15 дена стартува новата сезона во дел од првенствата кои ги следите, тогаш и не е дека во лето е тапа со фудбал.

Не му треба него помош од главен или четврти судија, ниту пак од ВАР, ќе си види сам дали е офсајд или не, голем е, само изгледа не добацува до таму. Во бразилската втора лига линиските судии имаат поголема слобода на движење.

Винисиус Жуниор го одигра својот прв меч за Реал Мадрид на Интернационалниот Куп против Манчестер Јунајтед кој заврши 2:1 за англискиот тим. Големата бразилска надеж за која Кралевите извадија 45 милиони евра изгледа многу го гледал Нејмар. На 18 години од тебе се бара да се докажуваш, а не да паѓаш ко покосен, па дури и ако те допреле во дуелов.

Нашиот легендарен Таско (Атанас Костовски) ако памтите во преносите на Хрватска на Светското 1998 го мешаше Давор Шукер со Ивица Шурјак, репрезентативец на Југославија (1973–1982). Сличен превид му се случи и на еден полски коментатор на Мундијалот во Русија со Меси и Марадона.

Ако некој мисли дека во Германија е намален апетитот за фудбал поради слабиот настап на Мундијалот, тотално се лаже. Кајзерслаутерн сезонава е третолигаш за прв пат во историјата со 40.000 навивачи кои одат на стадион.

Од 2006-та година до денес, пехарот од Лига на шампиони дури осум пати патуваше во Шпанија, само кај две екипи, се знае кои. Реал и Барса одбележаа една голема победничка ера и тоа копирајќи се едни со други.

Барселона против Валенсија на крајот од сезоната 2000/2001 имаше клучна пресметка вредна Лига на шампиони. Ја реши маестралниот Ривалдо на волшебен начин со три Г О Л Ч И Ш Т А. По таа неверојатна левица после првиот и вториот мајсторски гол, следуваше нешто што ретко се гледа. Не дека само тој има дадено гол со ножички, ама овие се некако посебни.

Ви ја претставуваме првата лига во Алжир, во сличен стил со онаа вчерашната акција во Полска. На фудбалерот до толку му беше непријатно, што фати да и се извинува на публиката.

Има многу играчи кои се презиваат Андерсон, ама он е познат по онаа најскратена бразилска форма само како Андерсон. Поделени се мислењата за квалитетите на овој играч, ама сепак ваквиот пад во кариерата го носи во нашата омилена рубрика.

Де бе куче нели сконта дека на иста финта те лета цело време. Зар на Меси не можеш да му ја земеш? Гледаш колку е слаб, не знае да дрибла па со рака ја фаќа.

Со оваа фотографија (веројатно) го завршуваме пост мундијалското реметење на човекот кој се посрамоти во Русија за сите пари.

Сите имаме по некој во маало што има промашено од ваква слична ситуација нели? Моментот е уствари што се плаши од тоа дека ќе ја даде.

Додека Италијанците одбројуваат до стартот на Серија А или поточно до дебито на Роналдо, некои навивачи работат на случајот и како да профитираат од првата појава на мегаѕвездата во нивниот град. Претерале малку.

Запознајте го Дриблињо, кучето кое извади од колосек не едно, туку две деца. Дрибла подобро од Нејмар на Светското. Ама сериозно.

За ваква балон топка од 50 метри да ја примиш во трчање, па уште и на мангупски начин треба да си...не знаеме што. Ете во случајов тоа е извесен Нико Лопез од Интернаcионал. Страшен осет. Браво.

Пред две години, селекцијата на Португалија стана европски првак со голот на Едер во 109-та минута. Синоќа Португалија У-19 стана европски првак со голот на Педро Кореира во 109-та минута. Како само успеаа да се поклопат.

Што да се каже за овие. Едниот штопер ја гледа топката, другиот се пишмани што се обиде да ја врати на голманот, а за понатаму сами ќе си видите. Антифудбалски потези во Полска. Ужас.

Веројатно прашањето број 1 кое треба да го избегнуваат новинарите кога го интервјуираат Златан Ибрахимовиќ е „Кога мислиш да се пензионираш?“. 36 години за голман е нормална возраст, а меѓу напаѓачите е нормална само ако си Ибра. 

Сте виделе ли вие како се игра пајдушко со топка, а истовремено во орото да има и жртва? Па овој после ова никогаш повеќе нема да помисли да му припари, а ништо чудно во голмани да отиде.

Бредли Рајт Филипс едвај чекаше да го постигне својот јубилеен 100-ти гол за Њујорк Ред Булс во МЛС лигата за да ја покаже фората што ја смислил. 

„Порасна со нас и победуваше со нас, среќен роденден Горан“, напиша Интер на својот Фејсбук профил и го постираше голот на Пандев со кој го тресна Баерн среде Алијанц Арена и го исфрли од осминафинале во ЛШ и тоа во 88-ма минута за пресврт од 2:3. Убаво од нивна страна.

Горда сум на него, бидејќи дојдовме од место каде немавме храна и облека, вели мајката на големиот талент кој не само што е успешно интегриран во Канада, туку е хит меѓу тинејџерите. Дрибла цели одбрани и реди рекорди. Допрва ќе се слуша за малиот.