Договорот е потпишан на три години. Рајнметал е еден од најголемите производители на оружје во Европа и фабрика која праќа бројни оружја и муниција за Украина во војната против Руска Федерација.
Договорот со Борусија Дортмунд вреди меѓу 7 и 9 милиони евра годишно, а навивачите биле помалку збунети од тоа што нивниот сакан клуб ќе рекламира фабрика за оружје. Според договореното логото на Рајнметал ќе се гледа на многу билборди и други рекламни паноа ширум стадионот „Вестфален“ кој има капацитет од 83.000 места.
„Безбедноста и одбраната се елементарни столбови на нашата демократија, така што мислиме дека е права одлука да се види како ние ги штитиме овие столбови“, рекол извршниот директор на Борусија Дортмунд Ханс-Јоаким Ватцке.
„Борусија Дортмунд е клуб од срцето на Северна Рајна-Вестфалија кој што значи многу повеќе од кој било друг по одлични настапи и меѓународен успех“, кажал првиот човек на фабриката за оружје Армин Папергер.
Дел од 200.000 членови на клубот биле збунети од ваквото решение на управата. Во ноември 2022-ра година клубот смислил етички кодекс во кој се декларира како посветен на „друштво без расизам, антисемитизам, хомофобија, сексисам, насилство и дискриминација“.
Рајнметал е позната фабрика која и во Втората Светска војна произведувала оружје и муниција за потребите на нацистичка Германија.
Германски Кикер пишува, а Дојче Веле пренесува дека Борусија Дортмунд се консултирала со луѓе од германската политика, економија и цивилно општество како и со своите членови пред да го потпише договорот.
А германскиот министер за економија Роберт Хабек не пропуштил прилика уште еднаш да порача од Берлин дека „Во постојан контакт сме со компании како Рајнметал и ги охрабруваме да произведуваат повеќе муниција за поддршка на Украина. За жал мора да прифатиме дека живееме во заканувачки свет“, рекол тој.
