Спиеш ли мирно Манчестер Сити?

Сити стана глобално семејство кое се протега во Манчестер, Њујорк, Мелбурн и Јокохама. Има еден перуански клуб кој не е дел од нив, ама пустиот гори од желба да биде.

На 9 февруари 2012-та во градот Пиментел во Перу група на луѓе формирале фудбалски клуб. Сонот на секое маало во тие краишта е да има тим. Овој станува познат по исклучителните играчи и достигнувања и за кусо време стигнува до полуфиналето од Купот во Перу.

Запознајте го Депортиво Серато познат и како Вили Серато за кој може слободно да кажеме дека е близнак на Манчестер Сити. Основачите на овој клуб не се мачеле многу околу изборот на боите и решиле потполно да го ископираат премиерлигашот

Депортиво носи слични дресови како Сити и го користи истото лого. Орелот, бродот, лентите и ѕвездите се идентични на двете логоа, а единствената разлика се иницијалите на клубот и мотото.

Кај Манчестер пишува "Superbia in Proelia" што во превод значи “Гордост во битката“, а кај Дапортиво стои името на градот Пиментел.

Перуанците кои ја формирале оваа екипа само неколку месеци по титулата на Сити остварена по 42 години пауза, јакото е што на ракавите од дресовите ги имаат и логоата на Премиер лигата и Лигата на шампионите.

Иако сево ова изгледа само на една пародија и класичен грабеж или имитација како сакате, Депортиво Серато кој постои само шест години, успеа да стигне до втора лига.

Аха и уште ова. Додека Манчестер Сити лани ја заврши сезоната со 106 дадени голови, имитаториве од Перу примија 116 на 28 меча и испаднаа во трета лига.

2 ноември 2018 - 12:28