Да не беше францускиот напаѓач Антони Модесте во топ форма, сега ќе пишувавме текст за неверување. Но ова е далеку од лошо или поточно е едно огромно изненадување поврзано со македонскиот напаѓач.
Опта излезе со извонредна статистика на тема кои се петмината најпрецизни стрелци во топ 5 лигите во Европа според процентот на реализација. Значи внимавајте не во Серија А, туку во Европа и во оваа топ листа на второ место се најде Илија Несторовски.
Со 67% реализација напаѓачот на Палермо е втор стрелец во конкуренција на цела плејада на напаѓачи кои заработуваат милиони во Премиер лига, Бундеслига, Ла Лига, Серија А и Лига 1.
Позицијата ја дели со Џермејн Дефо од Сандерленд, трет е Мауро Икарди од Интер, а листата на петмина играчи ја заокружува Мевлут Ердинк од Мец. Инаку Модесте е прв со 11 гола од вкупно 16 на Келн.
Палермо има ужасно лош старт во Серија А и само една победа по 12 минати кола, а единствената светла точка е Иле кој постигна 6 од вкупно 9 гола на тимот.
„Бев приземјен кога дојдов и приземјен сум сега кога вредам повеќе. Парите не можат никогаш да ме променат“, напиша Несторовски на својот Фејсбук профил по што неговите фанови не штедеа зборови и го нарекоа феномен, бомбардер...
Италијанците му предвидуваат блескава иднина и ја истакнуваат и неговата феноменална реализација од 69 голови на 90 настапи за Интер Запрешиќ во хрватското првенство.
Уживајте во неговите голови за Палермо
