Актуелната генерација македонски фудбалери ги направи најголемите успеси во историјата на репрезентацијата. По сензационалните триумфи над Германија и Италија и пласманот на Европско првенство, поддршката за нашите момци е поголема од кога и да е. Вечерва се врти нова страница, почнува нова сезона во Лига на нации.
Покрај Македонија и Бугарија, во групата се уште и Грузија и Гибралтар.
Што се однесува до меѓусебните дуели, со Бугарија досега сме играле седум пати. Имаме четири порази, две победи и една нерешена средба со гол-разлика во корист на нашиот источен сосед 7-3.
Необично, на бугарско тло досега не постигнала гол на две одиграни средби, така што се надеваме и веруваме дека вечерва Елмас, Барди, Трајковски и другарите ќе ја затресат мрежата на ривалот.
Досега сите седум натпревари со Бугарија ни беа пријателски. За првпат денес ќе играме за бодови.
Прв пораз од Бугарите ни е од најдобрата генерација на оваа селекција, со неверојатните Балаков, Стоичков, Лечков, Костадинов и другите кои во 1994-та година правеа дар-мар на Светското првенство во САД и стигнаа до големото полуфинале каде испаднаа.
Македонија против овие ѕвезди играше на 28 мај 1996-та година кога не победија 3-0 со головите на Емил Костадинов, Христо Стоичков и Иво Георгиев.
Втор пат изгубивме од Бугарите на стадионот на ЦСКА „Бугарска Армија“ со 1-0 на 15 август 2001-ва година. Тогаш легендарниот Балаков од пенал го постави конечниот резултат.
Може да се пофалиме и со две победи над Бугарија: во 1998-ма Христов беше стрелец за триумф од 1-0 а победивме и во 2013-та со головите на Агим Ибраими и Алекс Трајковски. Во актуелниот состав единствено Кире Ристевски, Столе Димитриевски и Александар Трајковски беа актери на таа средба.
Во 2016-та одново се сретнавме, во Скопје, кога гостите однесоа победа 0-2. Од тогаш Македонија е во сериозен подем, играше и на Европско првенство и направи светски сензации, а Бугарија е во историски пад со очајно слаби резултати поради што интересот во тамошната јавност за нивната репрезентација е на историски минимум.
СИТЕ НАТПРЕВАРИ МЕЃУ МАКЕДОНИЈА И БУГАРИЈА
12.04.1995: Македонија – Бугарија 0:0
28.05.1996: Бугарија – Македонија 3:0
25.03.1998: Македонија – Бугарија 1:0
15.08.2001: Бугарија – Македонија 1:0
01.03.2006: Македонија – Бугарија 0:1
14.08:2013: Македонија – Бугарија 2:0
29.03.2016: Македонија – Бугарија 0:2
Вкупен учинок на Македонија: 7 - 2 1 4 3:7
