Аргентинец од Зенит намерно добил црвен картон за да гледа Бока - Ривер

Во рускиот фудбал се отвори полемика околу намерните и многу ризични стартови на Леандро Паредес во кого сомневаат дека намерно направил црвен картон за да земе слободни денови.

Титер, Инстаграм, Фејсбук, Линкдин - речиси сите социјални мрежи деновиве се полни со најави за големото дерби Бока Јуниорс - Ривер Плејт, прв нивен дуел во финале на Копа Либертадорес.

Овие два клуба ги имаат можеби најжестоките навивачи на светот а ривалитетот кулминира кога играат меѓу себе. На овој двомеч во финалето се чека со нетрпение а некои од поранешните фудбалери на двата тима кои играат по Европа, сега бараат каква било причина за да му ја здувнат дома.

Таков е Леандро Паредес, добар техничар и мошне груб фудбалер, дете на Бока и сегашен играч на Зенит.

Минатото коло клубот од Санкт Петербург играше против Ахмат Грозни во руското првенство и победи со 1:0. А Паредес направил два груби старта и во рок од 15 минути добил два жолти и автоматски црвен картон. Посебно вториот прекршок на Паредес во 82’ минута бил многу груб и без никаква потреба на центарот од теренот:

Овој прекршок и црвен картон руските медиуми го толкуваат како намерен со цел Паредес да го пропушти следниот меч на Зенит и тоа можеби клучен во сезоната, гостување против ЦСКА во Москва, а со цел да се врати во Буенос Аирес и да го гледа дербито Бока - Ривер Плејт во финалето на Копа Либертадорес.

Леандро Паредес е повремен аргентински репрезентативец кој за две години во руското првенство заработил дури 15 жолти картони и е апсолутен рекордер по јавните опомени.

Тренерот на Зенит Сергеј Семак изјавил дека Паредес ќе биде казнет поради тоа што ја оставил екипата на цедило до крајот од мечот, а Бранислав Ивановиќ рекол дека ваквите работи на Паредес се повторуваат и дека треба да поработи на тој проблем затоа што влијае на екипата.