Хуманоидните роботи во училиштето во Хангџоу ќе мораат да поминат низ специјализирана обука и тренинг на физичките и логичките капацитети пред да полагаат завршен испит.
Предметите опфаќаат индустриска работа, безбедност, услуги за корисници, забава, па дури и медицина и уметност. Официјалниот сертификат ќе им овозможи веднаш да бидат испратени на работни места.
Училиштето во Хангџоу е многу повеќе од маркетиншки трик. Обуката и резултатите ќе им овозможат на производителите и на властите да ги стандардизираат механичките делови, софтверот и мерките за регулација на новата индустрија.
При дадена задача, сензори ќе го регистрираат секое движење на роботите. Наставниците ќе ги следат дејствата во живо и преку далечински управувач ќе ги корегираат постапките сè додека работата не биде извршена според планот.
Во проектот се вклучени речиси 40 компании за вештачка интелигенција и експерти од над десет универзитети и истражувачки институти.
Училиштето, исто така, им помага на компаниите да ги намалат трошоците за развој. Џоу Чен, директор на „DexRobot“, ја споредува ситуацијата со народна приказна.
Купувате седло од еден продавач, опремата за впрегнување од друг, уздите од трет, и на крајот завршувате со куп делови и без идеја како да ги составите. Токму затоа ни е потребна платформа. Оваа база ги обединува сите елементи, како библиотека за роботика. Доаѓате овде бидејќи сè што ви треба се наоѓа на полиците, објаснува Џоу.
