Се работи за нова студија од Стенфорд, што открива дека има два остри шпицови во биолошкото стареење - кон средина на 40-те и уште еднаш во раните 60-ти.
Промените не се само површински туку масивни - низ илјадници молекули во телото, меѓу протеини, РНК, липиди, дури и бактерии во цревата.
Првото нагло забрзување (околу 44 години) влијае на метаболизмот, кардиоваскуларното здравје и функцијата на кожата и мускулите. Второто (околу 60) влијае на регулацијата на имунитетот, функцијата на бубрезите и уште некои работи, а погодени се и мажите и жените.
Истражувачите следеле 135.000 молекуларни карактеристики кај 108 возрасни во текот на неколку години и стекнале повеќе од 246 милијарди податоци за да ги откријат овие „хотспоти“ на стареењето.
Интересно е што наодите се совпаѓаат и со наоди од други животни - како глувци или мушички, што кажува дека стареењето се случува во одредени фази, а не како мазен пад.
Потребни се уште истражувања, но сепак и ова отвора врати кон разбирање на начинот на кој старееме и како можеме да се справиме со предизвиците што доаѓаат.
