Иако главно сакаме да тврдиме дека не нѐ интересираат животите на славните, сепак кога некој ќе ти понуди да ѕирнеш во багажот на главната ѕвезда од Queen’s Gambit - кликаш. Можеби затоа што несесерот, исто како и библиотеката дома, исто како и спалната соба, открива детали за човекот што преку интервјуа не се откриваат. Кога им гледаш во ташна, се разбира, никаде не пишува дали спремиле однапред за лажно да се претстават - иако и самиот тој чин укажува на тоа дека луѓето се свесни дека соголување на ташната некогаш значи и општо соголување. Не ѝ поверувавме на Хејли Бибер дека и до продавница ја носи таа книгетина, ама ташната на Алекса Чанг? Човек може да се клади дека е таква.
Несесерот е друга приказна - не научуваш толку за карактерот - повеќе за навиките и она што овие луѓе што ги гледаме само на слики - ги прави убави. Како бонус - и тоа дека се луѓе што ќе претераат со бланширање на косата, ќе им падне, па ќе се осудат на вечно користење регенератор од корен до врвови.
