Ова се вика sleep maintenance insomnia, или несоница при која не можеш да го одржиш сонот. За разлика од класичната несоница, оваа форма не се однесува на тешкотија при заспивање, туку на прекин на сонот по неколку часа и неможност да се продолжи со спиење. Според проценките, во САД може да ја има секоја петта личност. Во Велика Британија, пак, се смета дека околу една третина од возрасните доживуваат акутна форма на ваква несоница во одреден период од животот.
Harvard Health наведува дека нарушувањето најчесто се појавува кај жени во менопауза или во средни години. Причините може да бидат различни - од хормонални промени и „жештини“, до стрес, депресија или здравствени состојби кои влијаат на циркадниот ритам.
Со возраста, природниот циклус на спиење станува пократок, а времето поминато во длабок сон се намалува, што ја прави оваа појава уште почеста.
Според д-р Карен Карлсон од општата болница Масачусетс во Бостон, најчестата грешка е обидот да се „надомести“ изгубениот сон со одење во кревет прерано.
„Она што често се случува е да легнувате многу рано, во обид да спиете повеќе, но се будите во 3 или 4 часот наутро - бидејќи телото едноставно не е програмирано за повеќе од шест до седум часа сон,“ објаснува таа.
Една од препораките на експертите од е т.н. clock blocking - избегнување да се гледа во часовник или телефон кога ќе се разбудите. На тој начин се намалува анксиозноста поврзана со времето и притисокот дека „мора“ да заспиете.
Ако останете будни повеќе од 20 минути, стручњаците советуваат да станете од кревет и да направите нешто без екран и без многу концентрација - на пример, да диплите алишта или да читате книга под слаба светлина. По „лоша“ ноќ, обидете се да го задржите истиот дневен ритам - да не доспивате подоцна или да одите порано во кревет.
Доколку проблемот трае со недели или сериозно влијае на вашето секојдневие, препорачливо е да се консултирате со лекар.
