По ДУП-от што општина Центар во 2014 го носи скроен од ВМРО ДПМНЕ и со насилство и притисоци од истите, цел еден рид и дотогаш недопрена шума од Водно се распределува во неколку складни плацови за неколку локални моќници и градежни тајкуни.
Иако во времето на доаѓање на СДСМ на власт купувањето на плацовите е прогласено за криминално, а носењето на ДУП-от (со притворање советници) беше скандалозно, ниту ДУП-от за Водно, ниту купувањето на овие парцели за цело ова време не е оспорено, уште помалку укинато.
ДУП-от и плацовите остануваат на истиот статус од 2014 (сè си важи) и покрај тоа што сега со Центар владее трет по ред градоначалник на СДСМ, имаа еден градоначалник на Скопје и веќе тераат втор мандат на централна власт.
Во редицата нововодњанци, прва и за сега единствена дозвола за градба има Ивица Георгиевски сопственикот на БиСи. Новоформираниот плац до него е на уште еден градежник, семејството Георгиевски (Мира и Богдан) кое стои зад Луна корпорација, и кое ја почнува процедурата за добивање дозвола за градба. Третиот плац е на МАНД на Пеце Наумовски, и остануваат уште двата кои се на суд - мега-плацот на „Ексико“ и плацот на Кара.
Последните активности на општина Центар во врска со овие плацови се да му дозволи на Ивица Георгиевски да почне со сеча на шумата на Водно и отстранување на сите дрва кои му пречат.
Како бонус на сето ова кога Владата го заштитуваше Водно, одлучи дека Водно е малку премногу заштитено па ја крена границата за градење и го намали опсегот на заштитена површина.
Француски апелациски суд ја потврди вината на Марин Ле Пен за злоупотреба на средства од ЕУ, но ѝ ја скрати забраната за извршување јавна функција од 5 години и ѝ остави можност да се кандидира на претседателските избори идната година.
Судот ѝ изрече 30 месеци условен затвор, кој веќе го отслужи, и 15 месеци носење електронска алка за следење, што може да ѝ направи сериозни логистички проблеми за време на предизборната кампања.
Судија дополнително ќе ги одреди часовите кога таа може да биде отсутна од својот дом и да ѝ го ограничи движењето. Ле Пен би можела да побара алката да ѝ биде отстранета по неколку месеци поради добро однесување.
Соочена со вакви ограничувања, на лидерката на француската десница ѝ останува самата да одлучи дали ќе се кандидира. Ако реши да се повлече, кандидат на десницата ќе биде нејзиниот заменик и политички наследник Жордан Бардела. И двајцата, според досегашните анкети, би освоиле најмногу гласови во првиот круг од изборите в година.
Казната за Ле Пен произлегува од обвиненијата дека функционери од нејзината партија Национален собир злоупотребиле средства од Европскиот парламент наменети за асистенти. Таа ги отфрла обвинувањата и тврди дека е жртва на политички прогон за да биде елиминирана од трката за претседател.
Литванија, поранешна советска република и сегашна членка на НАТО, ќе ја укине забраната за поставување нуклеарно оружје на нејзина територија за да се интегрира во западниот одбранбен систем за одвраќање на Русија.
„Геополитичката ситуација се влошува. Нашиот Устав беше напишан во време кога геополитичките околности беа сосема поинакви“, изјави претседателот Гитанас Науседа.
Набрзо потоа група од 50 литвански пратеници поднесоа предлог-амандман на Уставот за да ја овозможат промената на стратегиската определба. За да се усвои, неопходно е да добие поддршка од двотретинско мнозинство пратеници на две гласања во период од три месеци.
Парламентот на Финска во јуни изгласа целосна забрана на нуклеарно оружје за да се усогласи со политиката на одвраќање на НАТО, по приклучувањето кон Алијансата во 2023 година. Законот овозможува внесување, транспорт, чување или поседување нуклеарно оружје, доколку тоа го налага нејзината воена одбрана.
