Вести › Набрзинка

Уште еден проектил соборен над Турција

9 март 2026

Нов балистички проектил лансиран од Иран бил соборен во турскиот воздушен простор од противвоздушната одбрана на НАТО.
„Остатоците од муницијата паднаа на пусто место близу Газиантеп, 200 километри источно од Адана. Нема жртви ниту повредени“, објави Министерството за одбрана во Анкара. „Ќе бидат преземени сите потребни мерки... против секоја закана насочена кон територијата и воздушниот простор на нашата земја“, се додава во соопштението.
НАТО и на 4 март собори ирански проектил насочен кон Турција, пред да навлезе во нејзиниот воздушен простор. Претседателот Ердоган во саботата го предупреди Иран да не ја гаѓа Турција.
Амбасадата на САД во Анкара објави дека го затворила конзулатот во јужниот турски град Адана и ги повика сите американски државјани да го напуштат регионот. На десетина километри од градот е воената воздухопловна база Инџирлик, во која американските трупи се присутни со децении.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор