Вести › Набрзинка

Трамп постигна договор со Данска за Гренланд

19 септември 2026

САД, Данска и Гренланд постигнаа договор за трајно и ексклузивно американско воено присуство на огромниот дански остров богат со руди.
Детали од договорот не се познати, но во основа САД ќе имаат еднострано право да градат воени објекти без да бараат одобрение од Гренланд или Данска. Договорот нема временско ограничување и ќе важи дури и ако автономниот регион во иднина стекне независност.
Вашингтон ќе има право да блокира проекти и инвестиции на островот за кои ќе оцени дека ги загрозуваат интересите на САД“.
САД веќе имаат речиси целосни права за прелет и за користење бази на Гренланд, врз основа на договор од 1951 година. Сепак, Трамп во својот втор мандат упорно се закануваше дека ќе го анектира островот или бараше да го купи од Данска заради зајакнување на стратешката безбедност на САД.

Данската премиерка Мете Фредериксен оцени дека договорот „ја зајакнува заедничката безбедност на Арктикот“ и дека ќе биде потпишан на Генералното собрание на ОН идната недела.
Премиерот на Гренланд, Јенс-Фредерик Нилсен, изјави дека договорот ги уважува интересите на автономната територија.

извор

Доживотен затвор за четирикратниот убиец кој се праваше удрен

9 октомври 2026

Основниот суд во Куманово му изрече казна доживотен затвор на 25-годишниот Трајче Бојковски од Старо Нагоричане, прогласен за виновен за четири убиства и два обида за убиство на жени.
Осуден е за убиствата на Станче Каровска, Јанка Антевска, Марија Маринковска и Мира Станковска. Кривичните дела ги извршил од јануари 2025 до февруари 2026 година, а жртви барал меѓу повозрасни и немоќни жени кои живееле сами.
„Обвинетиот сериски убиец зјапаше во таван, неговиот адвокат дигна раце“, известивме за време на судењето.

извор

Рускиот блогер Рибар уапсен во Црна Гора

9 октомври 2026

Најпознатиот руски воен блогер Михаил Звинчук е приведен во Црна Гора под обвинување за ширење пропаганда и дезинформации од Кремљ.
Неговиот канал „Рибар“ има 1,5 милиони следбеници на платформата Телеграм.
Премиерот Милојко Спајиќ изјави дека службите за безбедност реагирале на информациите дека основачот на влијателниот канал може да ја дестабилизира Црна Гора преку кампања на дезинформации.
Заедно со Звинчук биле приведени и неговата сопруга и уште три лица. Им биле запленети софистицирана дигитална опрема, дронови, електронски уреди и телефони.
Имале намера да снимат документарен материјал за најавеното усогласување на визната политика на Црна Гора со стандардите на Европската Унија.
„Попусто нашите луѓе талкаат низ европските земји – дури и со добри намери и важни цели. Всушност, објавен е лов на сите Руси... Не помагаат ниту визи, ниту покани, ниту какви било други гаранции. Секој може да биде уапсен...“, реагира поранешниот руски претседател Дмитриј Медведев и предупредува: „Сега, по сè изгледа, ќе мораме да го надополниме нашиот фонд за размена со европски и американски идиоти за да си ги вратиме нашите луѓе“.

извор