- Претседателот Доналд Трамп повторно објави дека ги смета за неважечки сите помилувања и други документи што неговиот претходник Џо Бајден не ги потпишал лично, туку со автоматско пенкало.
- „Секој документ, проглас, извршна наредба, меморандум или договор потпишан неовластено со автопенкало во администрацијата на Џо Бајден се ништовни, неважечки и немаат понатамошна сила или ефект. Секој што добил помилувања, ублажување на казна или каков било друг правен документ потпишан на овој начин, имајте предвид дека документот е целосно раскинат и нема никаква правна сила“, порача Трамп.
- Тој и пред една недела потсети дека не е дозволено да се користи автоматското пенкалото без специфично одобрение од претседателот и тврди дека помошници на Бајден ја користеле машината без негово знаење.
- Не може да биде поништено помилувањето за „сторени или можно сторени дела“ на Хантер Бајден, синот на поранешниот претседател, затоа што тој документ е потпишан своерачно. Но, оспорени се помилувањата на Џејмс Бајден, братот на претседателот, и на докторот Ентони Фаучи.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
