По речиси двомесечно почитување на прекинот на огнот, САД втор ден по ред бомбардираа цели во Иран. Гаѓале радарски системи, противвоздушни батерии, центри за дронови во четири ирански градови.
Иран возврати со напади врз 18 американските воени цели во Кувајт, Јордан и Бахреин, вклучувајќи го и седиштето на Петтата флота во Манама.
Трамп најави уште пожестоки бомбардирања затоа што Техеран одбива да преговара. „Утре ќе ги бомбардираме до урнатини“, се закани вчера Трамп.
Трамп, исто така, изјави дека 200 танкери со 100 милиони барели нафта скришно поминале преку Ормускиот проток, заштитувани од американската морнарица. Тие поминале ноќе „на начин што Иран не може да го запре“, додаде шефот на Пентагон, Пит Хегсет.
Револуционерната гарда на Иран денеска соопшти дека го затвора Протокот и дека ќе отвори оган врз секој брод што ќе се обиде да премине.
Меѓународниот кривичен суд ја затвори долгогодишната истрага за злосторства извршени од американските сили во Авганистан по 2003 година.
Првичната истрага беше одобрена пред шест години, но долго време беше замрзната. Судскиот совет сега заклучи дека Обвинителството повеќе не е способно ефективно да спроведува истраги и да обезбедува докази, што дополнително се усложнува поради времето што изминало од извршувањето на наводните злосторства.
Ќе продолжи посебен случај „Ситуацијата во Авганистан II“, кој се фокусира на наводни злосторства на талибанците по август 2021 година, вклучително и прогон на жени и девојчиња. Меѓународниот кривичен суд веќе објави налози за апсење на високи талибански лидери.
САД не се членка на МКС и ја отфрлаат неговата надлежност врз американските државјани. Вашингтон воведе санкции против судии и обвинители откако Судот објави меѓународна потерница по израелскиот премиер Бенјамин Нетанјаху поврзана со злосторства во Газа.
Американскиот државен секретар Марко Рубио минатата недела го обвини Судот дека „го користи меѓународното право како инструмент на глобалните елити“.
Не сите веруваат дека отстранувањето на Хуанг Јенсен од Нвидиа се сведува на крими-трилер приказна каква што ѝ се нуди на јавноста, приказна за убава, згодна и вешта кинеска шпионка инфилтрирана како љубовница на кралот на чиповите.
Еден од таквите е Дејвид Сакс - поранешниот цар за вештачка интелигенција на Трамп, кој сега е копретседател на Советот на советници на претседателот за наука и технологија.
Во подкаст со уште неколку ИТ познавачи, се потсетува дека Јенсен беше еден од најголемите корпоративни опен сорс поддржувачи што беше голема главоболка на еден влијателен блок луѓе кои сакаа моделите и чиповите да се под построга контрола.
Шпионската приказна била само средство да се исполни главната цел.