- Ганон Кен Ван Дајк, наредник во специјалните сили на САД, е уапсен поради злоупотреба на доверливи воени информации заради личен профит. Се кладел на Полимаркет дека ќе има операција за грабнување на венецуелскиот лидер Николас Мадуро, откако бил лично вклучен во акцијата и бил запознаен со детали.
- Ван Дајк е обвинет дека на 26 декември отворил сметка на Полимаркет и вложил 33.000 долари на 13 облози поврзани со Мадуро и Венецуела. Точните предвидувања за строго доверливата акција на 3 јануари му донеле профит од речиси 410.000 долари.
- Поголемиот дел од добивката го префрлил во трезор за криптовалути во странство, пред да ги депонира во новосоздадена онлајн брокерска сметка.
- Соочен е со обвинение за измама преку интернет, што носи максимална казна од 20 години затвор, едно обвинение за незаконска парична трансакција и уште три за кршење на Законот за размена на стоки, секое со по уште 10 години затвор.
- Наредникот е првиот и досега единствениот човек обвинет за низата сомнителни обложувања на строго доверливи воени операции и на политички одлуки на САД. Комисија на Конгресот отвори истрага за инсајдерско тргување од милиони долари на берзите во врска со најмалку три одлуки за војната во Иран. Некој става облог од милиони долари и точно ги предвидува клучните изјави на Трамп неколку минути пред да ги каже.
- Бездомник од турскиот град Аланија пред суд признал дека намерно го навредил претседателот Реџеп Таип Ердоган, со цел да биде приведен и да добие храна и кревет во затвор.
- „Немам каде да престојувам, спијам по депонии“, изјавил 66-годишниот маж на првото појавување пред суд. Признал и дека претходно три пати намерно го навредувал Ердоган, но не го задржале во притвор.
- Според Членот 299 од Кривичниот законик на Турција, за навредување на претседателот е предвидена казна од една до четири години затвор.
- Иако овој член постои со децении, неговата примена значително се зголеми откако Турција во 2018 година премина кон претседателски систем.
- Во периодот од 2016 до крајот на 2025 година, обвинителите отвориле речиси 83.000 предмети за делата навредување на претседателот, знамето и државните симболи, турската нација и државните институции.
- Трамп блокира клучни американски санкции и царини поврзани со Русија, само неколку дена пред тие да стапат на сила согласно „Законот на Линдзи Греем“, усвоен од Конгресот и потпишан од претседателот минатиот месец.
- Мерките вклучуваат царини за увоз на руски стоки и казнени царини од 100% за земји што купуваат нафта и гас од Русија.
- Трамп истакна дека ги одложува санкциите „заради националниот интерес на САД“. Проценките се дека новите мерки дополнително ќе ги зголемат цените на горивата, токму пред изборите за американскиот Конгрес во ноември.
- Во новата наредба се истакнува дека законот не се укинува целосно и дека санкциите ќе може да бидат воведени „кога Трамп или високи функционери ќе проценат дека се соодветни“.
- Кирил Дмитриев, претставникот на Путин за инвестиции, ја нарече одлуката на Трамп „историски момент“, бидејќи законот ќе запрел секаква економска соработка меѓу Русија и САД.
