- Ако се пресметува според договорената цена од 1,3 милијарди евра од договорот на Македонија со „Бехтел и Енка“ за изградба на коридорите 8 и 10д, тогаш еден километар автопат ќе чини 12 милиони евра. Во Македонија, а и во регионов, се граделе автопатишта и за 4,4 милиони евра за километар.
- Во просекот од 12 милиони евра по километар не влегуваат и пеналите што македонската влада ќе треба да ги плаќа ако не исполни одредени услови во одреден рок, како на пример озаконувањето на 60-часовна работна недела, за што рокот е веќе поминат на 22 април, а обврската за пенали веќе тече.
- Кинеската компанија „Синохидро“ автопатот Штип-Миладиновци го заврши за 4,4 милиони евра за еден километар. Автопатот Кичево-Охрид беше договорен за 6,6 милиони евра за километар. И изградбата на автопатот Демир Капија – Смоквица со грчката компанија „Актор“ заврши со 7,79 милиони евра за еден километар.
- Ревизија на ЕУ открила дека хроничен недостаток на лекови е проблем во целата Унија. Особено погодена е Белгија.
- За две години, 27-те членки на Унијата пријавиле критичен недостаток на 136 лекови, вклучувајќи антибиотици и лекарства кои се користат за лекување после инфаркт, соопшти Европскиот ревизорски суд. Најмногу проблеми пријавила Белгија.
- Причините делумно лежат во проблемите со синџирот на снабдување и прекумерната зависност на Европа од Азија за клучните компоненти на лековите.
- Азиските производители сега ја снабдуваат ЕУ со 70 проценти од активните фармацевтски состојки што ѝ се потребни.
- Латвија им нареди на 841 руски државјани да ја напуштат земјата до понеделник, бидејќи не докажале дека го познаваат летонскиот јазик и не поминале низ задолжителни безбедносни проверки.
- По руската инвазија врз Украина на почетокот на 2022 година, Летонија го измени својот Закон за имиграција и лани дополнително го заостри за руските државјани. Од Русите се бара да аплицираат за статус на долгорочен престој во ЕУ, да покажат познавање на летонскиот јазик на ниво А2 и да поминат безбедносни проверки и проверки на биографијата најдоцна до 30 јуни годинава.
- Новите мерки се однесуваа на околу 30.000 руски граѓани во Летонија. Повеќето ги исполниле барањата, а околу 2.600 си заминале. Многумина од преостанатите не биле свесни дека рокот за регистрација изминал и дека ќе мораат да ја напуштат земјата најдоцна до 13 октомври.
- „Сфаќаат дека нешто не е во ред кога не им се исплаќа пензија. Се јавуваат: Зошто нема пензија? Им велиме: Немате дозвола за престој. Прашуваат: Каде е мојата дозвола за престој? Одговараме: Треба да се придржувате до законот“, изјави Мајра Розе, раководителка на Канцеларијата за државјанство и миграциски прашања.
