- Некои ги сакаат Мартиноски и Личеноски и Кондовски, за мене најголемиот беше Пенушлиски, таа магија никој не може да ја подари на овој свет, на оваа изгубена држава, која има сѐ, а сè прави за да нема ништо. Колку веста за заминувањето на Пенушлиски е болно за оваа држава, толку беше незамисливо и тивкото збогум на неговата и нашата Илинка Митрева.
- Булдожери за Македонија. Нашите чувари на државата, на оваа куќа која кој стига ја расклатува, ја понижува и потпалува, особено баш заради тоа, моравме да ги имаме Илинка и Илчо, застанати на ветрометина, со свои раце ја држеа, кога ја напаѓаа од сите страни. Не знаеме да цениме такви луѓе, да ги чуваме и штитиме. Затоа и имаме ваква држава.
- „Немаше никаква приврзаност кон нештата – само кон идеите, креацијата и луѓето. Беше исклучителен уметник, познат на многумина, но рамнодушен кон тоа да биде познат. Неговите идоли беа уметници, каубои, пијаници и Хозе Мухика“, напиша неговиот син Илија Митрев Пенушлиски.
- „Резултатите се јасни и болни за нас. Народот не ни даде мандат да управуваме,“ рече Виктор Орбан признавајќи го изборниот пораз после 16 години владеење.
- Победник на изборите е неговиот некогашен сојузник, Петер Маѓар и досегашната опозициона партија Тиса од десниот центар.
- Излезноста била рекордна - 79,33 %. На 81 процент преброени гласови, резултатот е 53,53 % за Тиса и Маѓар наспроти 37,84 % за Орбан и Фидес.
- Во мандати е уште појасно: 136 наспроти 56.
- Резултатите од унгарските избори беа дочекани со олеснување во Брисел. „Европското срце вечерва чука посилно во Унгарија“, поетски се изрази Урсула фон дер Лајен.
- Поразот на Орбан се гледа и како пораз на МАГА и американското влијание во Европа бидејќи ни посетите и поддршката од Марко Рубио и ЏејДи Венс не издејствуваа поволен резултат за унгарскиот сојузник на Доналд Трамп.
- „Американската морнарица, најдобрата во светот, ќе започне со процесот на БЛОКАДА НА сите бродови што се обидуваат да влезат или да излезат од Ормускиот теснец“, напиша Доналд Трамп на Truth Social.
- Ова е негова одлука по веста дека преговорите со Техеран биле плодни но не се постигнал договор за ураниумот и неговото збогатување.
- Трамп ѝ наложил на морнарицата „никој што плаќа нелегален данок да нема безбеден премин на отворено море“ и да почне со уништување на мините што Иранците ги поставија во теснецот.
- Американскиот претседател тврди дека и други земји ќе бидат вклучени во неговата блокада, за на Иран да не му се дозволи да профитира од нелегалната изнуда.
