- Американски танкер што пренесувал гориво за авиони се запали по судир со товарен брод што носел 15 контејнери со токсичен натриум цијанид во Северно Море покрај брегот на англискиот регион Јоркшир.
- Евакуирани на брегот се сите членови на екипажот на американскиот танкер „Stena Immaculate“ и на товарниот брод „Solong“ што пловел со португалско знаме.
- „Stena Immaculate“ е на списокот од 10 танкери што САД на повик ги користат за транспорт на гориво за американски воени сили за време на оружени судири или за вонредни состојби. Не е потврдено дека танкерот бил во таква мисија кога испловил од грчко пристаниште во Егејско Море на пат кон англиското пристаниште Хал.
- „Solong“, со капацитет да пренесува 9.500 тони контејнери, пловел за Ротердам.
- Министерството за правда на САД објави десетици илјади документи од дебелото досие за Џефри Епстин. Јавноста очекуваше дека ќе види докази за врски на претседателот Доналд Трамп со синџирот за елитна проституција, но тој е спомнат само неколку пати, во неутрален контекст.
- Ама, во објавените материјали има повеќе од 20 фотографии за поранешниот претседател Бил Клинтон - прикажан во џакузи, покрај девојки или како плива заедно со Гислен Максвел, партнерката на Епстин.
- Во обемната библиотека што може да се пребара тука, има и фотографии од британскиот принц Ендрју и од естрадни ѕвезди како Мајкл Џексон, Дајана Рос и Мик Џегер во друштво со Епстин. Нема објаснувања кога биле направени фотографиите и во каков контекст.
- Во документите се зацрнети имиња на повеќе од 1.200 девојки и други лица што се сметаат за жртви во синџирот за проституција. Во едно досие се зацрнети повеќе од 100 страници.
- Во архивите на Министерството има уште илјадници документи за Епстин, кои ќе бидат објавувани во фази, откако ќе бидат заштитени идентитетите на потенцијалните жртви.
- Американски авиони и хеликоптери вчера извршиле воздушни напади врз 70 цели на групата ИСИС во Сирија како одмазда за убиството на двајца американски војници и нивниот преведувач пред една недела близу Палмира.
- „Ова не е почеток на војна, туку одмазда. Под водство на претседателот Трамп, САД никогаш нема да се колебаат за одбрана на нашиот народ“, порача шефот на Пентагон, Пит Хегсет.
- Ова е прва голема интервенција на САД по затоплувањето на односите со привремениот сириски претседател Ахмад ал Шара, поранешен лидер на терористичка група по кого беше распишана американска потерница со награда од 10 милиони долари.
- Трамп синоќа ја повтори поддршката за Ал Шара и за сириските владини трупи, за кои оцени дека се „на страната на САД“ во борбата против тероризмот.
