- Носачот на авиони „Џорџ Вашингтон“ е на пат од Пацификот кон Блискиот Исток за да го замени „Абрахам Линколн“, чиј екипаж е исцрпен по повеќе од 250 дена поминати на море.
- Роднини на морнари од „Линколн“ и анонимни извори деновиве објавија дека имало најмалку шест обиди за самоубиство на бродот поради менталната криза од долгата мисија. Еден морнар на 3 август „паднал“ во море, но бил спасен.
- „Постојат бројни извештаи за недостиг на основни залихи, загадена вода, проблеми со водоводните и канализациските инсталации, влошено ментално здравје, загриженост за безбедноста на палубата и пречки во поштенскиот систем, поради што многу пакети за морнарите се губат во транспортот“, напиша сенаторот Ричард Блументал во протестно писмо до шефот на Пентагон, Пит Хегсет, и секретарот на Воената морнарица Хунг Цао.
- Носачот „Џорџ Вашингтон“, чија матична база е во Јапонија, изминативе недели оперираше во Јужно Кинеското Море, а неодамна неодамна помина низ теснецот Малака, движејќи се кон запад во придружба на разурнувачи. Неговото преместување ќе отвори дупка во патролите на САД покрај пацифичките бази во Источна Азија.
- „Поради војната со Иран, може да бидат потребни три години за флотата да се врати во состојба на подготвеност. Ако имате два или три носачи на секој брег на кои им е потребна поправка или одржување во различни фази, тие ќе мора да чекаат ред“, изјави поранешниот поморски офицер Брајан Кларк, аналитичар во Институтот „Хадсон“.
- Во октомври ќе биде промовирана новата мобилна апликација м.Услуги, во која ќе бидат достапни дигитални верзии на личната карта и на возачката дозвола, најави министерот за дигитална трансформација, Стефан Андоновски.
- Преку м.Услуги, граѓаните на едно место ќе можат да пристапуваат до личните документи во дигитална форма како и до електронските услуги на администрацијата. Целта е државните услуги да станат подостапни и поедноставни за користење, директно преку мобилен телефон.
- Министерството во изминатиот период интензивно работело на прашањата поврзани со сајбер-безбедноста, заштитата и начинот на чување на личните податоци, како и нивната размена со МВР, кое е сопственик на податоците.
- „Во завршна фаза сме на усогласување и потпишување на протоколот за размена на податоците, како и на тестирањето на апликацијата. Сакаме, пред таа да биде достапна за сите, да бидеме сигурни дека системот е стабилен, безбеден и едноставен за користење. Апликацијата ќе биде достапна на App Store и Google Play, а нејзината тест-верзија досега ја презедоа околу 6.000 граѓани“, рече Андоновски.
- Следниот чекор во дигиталната трансформација е мобилниот телефон постепено да стане дигитален паричник преку кој граѓаните безбедно и едноставно ќе пристапуваат до своите документи и до услугите на државата.
- Грабнатиот венецуелски претседател Николас Мадуро тврди дека како шеф на суверена држава има имунитет од кривично гонење во странство и побара од судијата во Менхетн да ги отфрли кривичните обвиненија за трговија со дрога против него.
- Обвиненијата послужија како основа за американската воена интервенција во Каракас на 3 јануари, во која Мадуро беше грабнат од претседателската палата и беше префрлен во федерален затвор во Бруклин. Судењето е закажано за 1 јуни 2027 година.
- Принципот според кој актуелните шефови на држави уживаат имунитет од кривично гонење во странство е долгогодишно начело, кое се смета за темел на дипломатијата. Одлуката на окружниот судија Алвин Хелерстајн претставува тест за општата воздржаност на американските судови во однос на примената на меѓународното право во кривичните постапки. Вашингтон не го признава Мадуро како претседател на Венецуела уште од 2019 година, а судовите обично го следат ставот на американскиот претседател.
- Адвокатот на Мадуро, Бери Полак, тврди дека венецуелскиот претседател е лажно обвинет, бидејќи дејствијата за кои се товари биле дел од неговите службени должности. „Овој случај на кривично гонење без преседан го крши апсолутниот имунитет од кривична јурисдикција, на кој со векови имаат право шефовите на држави и странските функционери кои дејствуваат во својство на службени лица“, напиша Полак.
- Кривичните постапки во САД против шефови на странски држави се исклучително ретки, но праксата не му оди во прилог на Мадуро. Во 1990 година, федерален судија во Мајами го отфрли обидот на поранешниот воен лидер на Панама, Мануел Нориега, да се повика на имунитет како шеф на држава, делумно и поради тоа што тој никогаш официјално не бил претседател.
