- Рускиот претседател Владимир Путин во телефонски разговор од два и пол часа го убедил Доналд Трамп да не ѝ дава крстосувачки проектили Томахавк на Украина. Путин и Трамп договориле нова директна средба, до крајот на октомври во Будимпешта, за да разговараат за крај на војната во Украина.
- „Путин го предупреди Трамп дека испраќањето проектили со дострел од 1.600 километри на Украина нема да ја промени ситуацијата на бојното поле, но ќе предизвика значителна штета во односите помеѓу двете земји“, изјави Јури Ушаков, советник на Путин за надворешна политика. Двајцата лидери разговарале и за „колосалните“ можности за трговија кога ќе заврши војната во Украина.
- „И на нас ни се потребни томахавките. Ги имаме, ама ни требаат. Мислам, не можеме да ја осиромашиме нашата земја“, изјави Трамп веднаш по телефонскиот разговор со Путин.
- Трамп денеска во Белата куќа ќе се сретне со украинскиот претседател Володимир Зеленски, кој пристигна во Вашингтон за да ги обезбеди моќните проектили. Разговорот Трамп-Путин тој го оцени како „знак дека Москва се плаши од томахавките и затоа брза да ги обнови преговорите“.
- Бугарското Национално собрание по итна постапка усвои закон што на државата ѝ овозможува да преземе директна контрола врз рафинеријата на руската компанија Лукоил во Бургас.
- Цел на Законот е да се обезбеди работење на најголемата рафинерија на Балканот откако Лукоил поради санкции од САД беше принуден да го продаде својот имот во странство.
- Владата ќе назначи специјален администратор, кој ќе управува со компанијата ако се оцени дека постои ризик по националната или енергетската безбедност на земјата. Бугарската влада тврди дека ова не е национализација, туку „заштитна мерка што ќе се активира само ако работењето на рафинеријата биде загрозено“.
- Администраторот ќе има право да гласа во името на акционерите, да управува со средствата и, ако е потребно, да предложи продажба или преструктурирање на делови од компанијата.
- Рафинеријата во Бургас обезбедува најголем дел од горивата за бугарскиот пазар и овозможува извоз во соседните земји.
- Турција објави налози за апсење на израелскиот премиер Бенјамин Нетанјаху и високи функционери во неговата влада. Ги обвинува за геноцид против Палестинците во Газа и злосторства против човештвото.
- На списокот се 37 израелски функционери, вклучувајќи ги министерот за одбрана Израел Кац, министерот за национална безбедност Итамар Бен Гвир и началникот на Генералштабот на Израелските одбранбени сили Ејал Замир.
- Во соопштението на Анкара се спомнува и инцидентот од март годинава, кога беше гранатирана „Болницата за пријателство“, изградена од Турција во Појасот Газа. Израелските одбранбени сили во тоа време соопштија дека објектот го користеле оперативци на Хамас и дека „не бил користен како активна болница повеќе од една година“.
- Отфрлајќи ги обвиненијата, израелскиот министер за надворешни работи Гидеон Саар ги нарече „најновата пи-ар акција на тиранинот Ердоган“.
- „Налозите за апсење на високи израелски функционери јасно објаснуваат зошто Турција не треба да биде присутна во Појасот Газа - директно или индиректно“, порача поранешниот министер за надворешни работи Авигдор Либерман. Турција сака да биде дел од меѓународните сили за стабилизација од планот на Доналд Трамп за повоена Газа.
