- Српската православна црква во Грачаница го одбележа „Мартовскиот погром“ во кој во 2024 година беа осквернавени, запалени или уништени 35 верски објекти, меѓу кои и 18 споменици на културата.
- На локални косовски телевизии биле пренесувани вандалските акти на насилство на албанските екстремисти во кои се уништиле бројни икони и други културни драгоцености кои ја преживеале и османлиската ера и светските војни.
- Биле срушени 800-900 куќи на Срби, биле протерани преку 4.000 Срби а имало и 19 загинати, и Срби и Албанци.
- „17 март 2004 година особено болно го погоди српскиот народ и неговата црква, бидејќи сето ова не се случи за време на воен хаос, туку во присуство на илјадници припадници на меѓународните мировни сили КФОР, косовската полиција и УНМИК, од кои никој јавно не ја презеде одговорноста за бројните пропусти“, се наведува во соопштението на СПЦ.
- Албанскиот парламент усвои резолуција со која Иран се прогласува за „спонзор на тероризмот“, а Револуционерната гарда и милицијата Хезболах за „терористички организации“.
- За резолуцијата гласаа сите пратеници од владејачката Социјалистичка партија, а опозициските ја оценија како „лична агенда“ на премиерот Еди Рама и ја напуштија салата пред гласањето.
- Односите помеѓу Техеран и Тирана со години беа нарушени поради тоа што Албанија, со поддршка од САД, од 2013 година им укажува гостопримство на околу 3.000 припадници на забранетата група Муџахедин Халк (МЕК) – исламска политичка организација наклонета кон социјализмот.
- МЕК крена оружен бунт против династијата на Реза Пахлави, во 1970-те спроведуваше бомбашки напади против американски и владини цели и ја поддржа Исламската револуција на ајатолахот Хомеини. Но, откако исламските власти ја забранија, групата се префрли во Ирак, учествуваше во војната против Иран и имаше поддршка од Садам Хусеин. По соборувањето на неговиот режим се префрли во Албанија и агитираше за соборување на исламскиот режим во Техеран.
- Израел објави дека при воздушен напад синоќа бил убиен Али Лариџани, секретарот на иранскиот Врховен совет за национална безбедност и практично главен командант во војната против Израел и САД. Лариџани наводно бил ликвидиран во засолниште во кое престојувал со својот син.
- Израелскиот министер за одбрана изјави дека е ликвидиран и Голамреза Солејмани, командантот на милицијата Басиџ задолжена за заштита на режимот во Техеран од домашни закани. „Заедно со премиерот (Нетанјаху) им наложивме на Израелските одбранбени сили да продолжат да го ловат раководството на режимот на угнетување во Иран“, изјави министерот Израел Кац.
- Иранските власти не ја потврдија веста за смртта на Лариџани и Солејмани.
- Лариџани последен пат беше се појави во јавноста на 13 март. Тој му беше близок советник на поранешниот врховен лидер Али Хамнеи, 12 години беше претседател на парламентот, а претходно беше главен преговарач на Техеран за нуклеарната програма.
- Во една од своите последни обраќања, Лариџани се пожали дека Иран не ја добива очекуваната поддршка од муслиманските земји. „Ниедна исламска влада не застана покрај народот на Иран, освен во ретки случаи. САД и Израел од една страна и муслиманскиот Иран и силите на отпор од друга страна. На која страна од оваа битка стоите?“, порача Лариџани.
