Кочанското обвинителство отвори истрага за вкупно 34 лица, од кои седуммина се полицајци, а три се правни лица. Осомничени се дека во периодот од 2012 година, кога првпат почнала да функционира „дискотеката на смртта“, со верижни пропусти и незаконити дејствија воопшто не постапиле според прописите за заштита и се одговорни за пожарот во кој изгореа 59 лица, меѓу кои и шест малолетни, а со тешки повреди се уште 197 лица од кои 25 деца.
На денот на трагедијата, сопственикот, потоа продавачот на влезници и обезбедувањето, според Обвинителството, овозможиле во дискотеката таа вечер да влезат околу 650 посетители, помеѓу кои имало најмалку 31 дете.
Еден од осомничените продавал билети без да води сметка за бројот и возраста на гостите што смеат да присуствуваат, спротивно на Законот за угостителска дејност, овозможувајќи влез и присуство и на малолетни лица на настанот. Тие не спречиле во дискотеката да се внесат пиротехнички фонтани што беа употребени на настапот, иако немале задолжителна дозвола издадена од надлежни органи за да ракуваат со пиротехнички средства, ниту просторните услови дозволувале употреба на такви пиротехнички средства – соопшти Љупчо Коцевски.
Осомничени се и двајца поранешни директори на Државниот пазарен инспекторат и тројца инспектори затоа што ниту еднаш од 2020 до трагедијата не влегле и не извршиле контрола на нелегалната дискотека за да утврдат дали има важечка лиценца и дали ги исполнува пријавените минимално-технички услови.
Чеченскиот претседател Рамзан Кадиров забрзано го спрема својот 18-годишен син Адам за наследник. Му додели нов медал поради „значаен придонес за обезбедувањето на безбедноста, стабилноста и просперитетот на татковината“.
Премиер Магомед Даудов на свечената церемонија го нарече Адам „енергичен и ефикасен лидер способен да решава сложени проблеми со принципиелност и лојалност кон каузата.“
Градите на младиот Кадиров ги красат едно чудо медали, доделени од неговиот татко, но и од Москва, а ја има и титулата „Херој на Чеченската Република“. Во Руската книга на рекорди е запишан како најмлад шеф на регионална безбедносна служба.
Стариот Кадиров пред една недела итно бил префрлен во болница во Москва поради сериозно влошена здравствена состојба. Локални медиуми тврдат дека лекарите едвај успеале да го реанимираат. По неколку дена тој се појави во јавноста со новогодишна порака до Чеченците.
Подaтоците од беспилотното летало на украинските вооружени сили, соборено за време на нападот врз руската претседателска резиденција во Новгорог му беа предадени на претставник на Канцеларијата на военото аташе во Амбасадата на САД, соопшти руското Министерство за одбрана.
Декодирањето на податоците од украинскиот дрон недвосмислено потврдуваат дека целта на нападот бил комплексот згради во кои се наоѓа руската претседателска резиденција, изјави Игор Костјуков, началник на Главната разузнавачка управа на Генералштабот.
Украина демантира дека имале таква операција а официјален Киев тврди дека Русија го има измислено целото сценарио. Нивните разузнавачи сугерираат дека инцидентот ја подготвува јавноста за претстојна голема вооружена провокација на Русите.
