- Имаме ново парламентарно мнозинство, објави на својот Фејсбук-профил Христијан Мицкоски.
- Неговата објава е проследена со заедничка фотографија со претставници на Левица, Беса, Алијанса за Албанците и Алтернатива.
- Ваквиот епилог доаѓа откако БЕСА одлучила да ја напушти власта после одлуката на Државната изборна комисија да има прегласување во Желино по приговори поднесени од ДУИ.
- На мигрантите во Грција на кои ќе им биде одбиено барањето за азил ќе им бидат ставени електронски алки на глуждовите, заради побрза депортација, најави владата.
- Министерот за миграција Танос Плеврис објави дека оваа мерка ќе почне да се спроведува до крајот на годинава, согласно реформите за криминализација на непридржувањето на одлуките за депортација.
- Електронското надгледување ќе биде спроведено во периодот од 30 дена што мигрантите го имаат за да обжалат одлука за депортација.
- Мерките опфаќаат и задолжителни затворски казни за оние што ќе одбијат налог за депортација, но и стимулација од 2.000 евра за оние што ќе го почитуваат.
- Грција летово е на удар на масовен бран нелегални мигранти што со бротчиња доаѓаа од Либија на островот Крит. Само во првите десет дена од јули биле приведени повеќе од 7.000 нелегални мигранти, претежно млади мажи. Во обид да ги одврати мигрантите владата на Кирјакос Мицотакис реши за три месеци да ги суспендира процесите за давање азил.
- Колумбискиот сенатор и претседателски кандидат Мигел Урибе почина два месеци откако беше застрелан во главата и во грбот на предизборен митинг во Богота.
- Неколку часа по атентатот полицијата уапси 15-годишно момче, обвинето дека пукало во сенаторот. На сослушувањето тоа рекло дека убиството го нарачал локален наркодилер.
- Досега се уапсени вкупно шест лица, вклучувајќи и двајца мажи обвинети дека го планирале убиството, но нема траги кој го нарачал атентатот.
- Министерството за одбрана нуди награда од 3 милијарди пезоси (740.000 долари) за информација што би помогнала да бидат откриени и фатени организаторите. Во истрагата на колумбиските власти им помагаат САД, Британија и Обединетите Арапски Емирати.
- Урибе, од влијателно политичко семејство во Колумбија, важеше за ѕвезда во подем. Неговата мајка, новинарката Дијана Турбај, беше киднапирана од наркокартелот Меделин на Пабло Ескобар и беше убиена при неуспешниот обид за ослободување. Неговиот дедо Хулио Сезар Турбај беше претседател на Колумбија од 1978 до 1982 година.
