Вести › Набрзинка

ОН го одобриja планот на Трамп за Газа

18 ноември 2025

Советот за безбедност на Обединетите нации го одобри планот на американскиот претседател Доналд Трамп за мир во Газа и авторизираше воспоставување меѓународни сили за стабилизација во палестинската енклава.
Резолуцијата отвора пат за членките на ОН да учествуваат во Одборот за мир, кој ќе биде преодна власт во Газа што ќе ја надгледува реконструкцијата и економската обнова. Меѓународните стабилизациски сили (ISF) ќе го надгледуваат процесот за демилитаризација, уништување на воената инфраструктура и одземање на оружјето.
Русија и Кина се воздржаа од гласање, но не ја блокираа резолуцијата. Тие реагираа дека резолуцијата не дефинира јасна улога на Обединетите нации во иднината на Газа. „Во основа тоа е благослов на ветувањата од Вашингтон за Одборот за мир и Меѓународните стабилизациски сили, за кои засега не знаеме ништо“, изјави рускиот амбасадор Василиј Небензја.
Иако првично го поддржа планот на Трамп, Хамас ја отфрли резолуцијата на ОН и објави дека нема да го предаде оружјето.
Израелскиот премиер Бенјамин Нетанјаху ја критикуваше резолуцијата зашто во текстот е оставена можноста Палестинците да добијат држава. Тој најави дека Израел ќе ја демилитаризира Газа „со арно или со сила“.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор