- Милионите документи од огромното досие за Џефри Епстин содржат докази за дела што претставуваат злосторства против човештвото, оценија експерти ангажирани од Советот за човекови права на ОН.
- „Документи сведочат за тргување и дехуманизација на жени и девојчиња. Размерите, природата, систематскиот карактер и транснационалниот дострел на овие злосторства се толку големи, што голем број од нив го преминуваат прагот да бидат сметани за злосторства против човештвото“, соопшти панелот од независни експерти.
- Експертите рекоа дека злосторствата наведени во документите објавени од Министерството за правда на САД се извршени „во услови на супремацистички верувања, расизам, корупција и екстремна мизогинија“.
- Панелот на ОН повика на независна, темелна и непристрасна истрага не само за сомневањата што произлегуваат од документите, туку и за тоа како било можно вакви злосторства да се извршуваат толку долго.
- Во повеќе од 3 милиони документи од досието Епстин што досега се објавени, идентификувани се над 1.200 жртви на неговата мрежа за елитна проституција, вклучувајќи и малолетнички.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
