Вести › Набрзинка

Минимална победа на Голоб против Јанша

23 март 2026

Премиерот Роберт Голоб прогласи победа на неговата партија Слобода на парламентарните избори во Словенија, но актуелната владина коалиција го изгуби мнозинството.
Според преброени 99,85% од гласовите, Слобода освоила само 7.749 гласа повеќе од СДС на Јанез Јанша, но и едно пратеничко место повеќе – 29 наспроти 28.
Во Националното собрание влегоа и коалицијата НСи-СЛС-Фокус, со 9 пратенички мандати, СД и Демократите со по 6 места, а по пет ќе имаат блокот Левица-Весна и партијата Ресни.ца.
Ниту партијата на Голоб ниту СДС на Јанша со своите традиционални сојузници не можат да соберат мнозинство од 46 пратеници, поради што се очекуваат тешки коалициски преговори.
Кампањата помина во сенка на обвинувања за корупција проширени на социјалните мрежи преку протечени аудио-снимки, и контраобвинувања за надворешно мешање од израелската приватна разузнавачка компанија Блек кјуб, чии претставници се сретнале со Јанша.

извор

Босна и 22 земји бараат европска истрага за „Сараевско сафари“

22 јуни 2026

Откако италијански обвинители признаа дека засега немаат доволно докази да покренат судски процеси против лица осомничени за „Сараевското сафари“, се зголемува политичката поддршка во Советот за Европа да отвори официјална истрага за наводните злосторства од Босанската војна.
Босна, која ја покрена иницијативата, објави дека пратеници од уште 22 земји (вклучувајќи ја и Македонија) во најстарото европско тело поддржале формирање специјална комисија за истрага на тврдењата дека силите на босанските Срби им овозможувале на странски „туристи“ да пукаат од снајперски пушки врз цивили во Сараево за време на воената опсада на градот.
Случајот „Сараевско сафари“ беше отворен со документарецот на словенечкиот режисер Миран Зупанич и книгата на италијанскиот автор Ецио Гавацени посветена на „викенд снајперистите“ во Босна. Хрватскиот новинар Домагој Маргетиќ тврди дека и актуелниот српски претседател Александар Вучиќ бил присутен на „сафарито“.
Обвинителството во Милано отвори истрага против петмина италијански државјани што учествувале во злосторничката шема, а виенското судство покрена случај против еден Австриец. Карабинерите деновиве извршиле претрес во дом на еден од осомничените - 66-годишен поранешен општински службеник од Џенова, пронашла негова фотографија со снајперска пушка, но тој го искористил своето право да не одговара.

извор

На Изрелците им е јасно: Иран победи во војната

22 јуни 2026

Нова анкета покажува дека 92 проценти од израелската јавност верува дека Иран е победник во конфликтот со САД и Израел.
82,9 проценти од Израелците веруваат дека војната против Иран ја ослабнала долгорочната безбедност на Израел.
Според анкетата спроведена од Хебрејскиот универзитет, огромното мнозинство од израелското население има негативен став кон договорот на Доналд Трамп со Иран, кој вклучува прекин на огнот меѓу Израел и Хезболах во Либан.
И ставот кон премиерот Бенјамин Нетанјаху е убедливо негативен: 72,5 проценти не му веруваат кога тврди дека Израел постигнал значителни придобивки и отстранил егзистенцијална закана.
Речиси половина од луѓето (48,2%) се за продолжување на воената акција против Хезболах, дури и по ризик од судир со Трамп.

извор