- Изградбата на градската продавница што ја најави њујоршкиот градоначалник Зохран Мамдани во Харлем ќе чини четири пати поскапо од било кој друг супермаркет во градот.
- Градските власти ќе издвојат 30 милиони долари за продавница од 836 квадратни метри, што значи дека изградбата ќе чини речиси 36.000 долари по квадрат.
- За да се врати инвестицијата во рок од шест години, супермаркетот ќе треба да има дневен промет од 137.000 долари и профит од 13.000 долари.
- Мамдани најави дека ќе ја прошири иницијативата со изградба на пет градски продавници низ Њујорк – по една во секоја општина, за сума од 70 милиони долари.
- „Веројатно би можел да отворам 10 продавници со 70 милиони долари“, оцени магнатот на супермаркети Џон Кациматидис.
- Герман Греф, директорот на најголемата руска банка Сбербанк, повика војната во Украина да запре „што е можно побрзо“.
- Тој е еден од ретките високи раководители лојални на Кремљ што се спротивставил на војната, која во изминатите месеци почна сериозно да ги оптоварува економијата и финансискиот систем на Русија.
- „Мислам дека сите сме загрижени за истото. Нема ниту еден човек во земјата кој е загрижен за нешто друго освен за брзо завршување на воената акција. Тоа е очигледно“, рекол Греф на состанок со акционерите.
- Сбербанк е најголемата банка во Русија, контролира огромен дел од штедните влогови и корпоративните кредити во земјата. Со оглед на тоа што е во мнозинска сопственост на руската влада, таа претставува столб на банкарскиот систем на земјата.
- Новата унгарска влада го укина статусот на бегалец на поранешниот полски министер за правда Збигњев Зјобро и на неговиот заменик, кои избегаа во Будимпешта откако во својата земја беа обвинети за за злоупотреба на службената должност.
- Поранешниот премиер Виктор Орбан им додели азил на Зјобро, неговата сопруга и на заменикот Марчин Романовски, кој исто така е соочен со обвинение.
- Зјобро и Романовски се соочуваат со обвиненија за злоупотреба на пари од фонд за помош на жртвите на криминал. Тие ги отфрлаат обвиненијата и тврдат дека се жртви на политички „лов на вештерки“ бидејќи истражувале злоупотреби од страна на луѓе блиски до сегашниот полски премиер Доналд Туск.
- Двајцата веројатно повеќе не се во Унгарија. На 9 мај - денот кога новиот унгарски премиер Петер Маѓар положи заклетва – Зјобро бил забележан на аеродром во САД, а не е познато каде се наоѓа Романовски.
