- Зад глобалниот ИТ крах кој затвори аеродроми, банки, медиуми и сервиси ширум светот не стоел хакерски напад туку погрешен апдејт на софтверот на компанијата CrowdStrike.
- Сите засегнати го користеле софтверот за сајбер безбедност на сеприсутниот CrowdStrike чиј апдејт ги шлогираше компјутерските системи со “blue screen of death”, сигнал дека нешто не е в ред со оперативниот систем на Микрософт Виндоус.
- Грешката брзо и релативно лесно била поправена но глобалниот дефект покажа колку е ранлива целата ИТ архитектура кога огромен број големи и важни субјекти користат услуги од мал број провајдери на критични услуги.
- Најпоштедена од сите тие ујдурми беше Кина, што покажува дека не беа залудни нивните напори за технолошка независност.
- „Се отвора Пандорината кутија“, велат луѓе кои се бават со јавни набавки во една хрватска државна фирма по повод скорешна одлука на Судот на ЕУ.
- Очекуваат тектонски промени во јавните набавки во земјата, особено за големите инфраструктурни зафати кои ги изведуваат државни фирми, откако судот порача дека компании од трети земји кои немаат склопено меѓународен договор со ЕУ, не можат да учествуваат во јавните набавки во земјите од Унијата.
- По тужба на турска компанија која изгубила од австриски конкурент (за железничката пруга Хрватски Лековац - Карловац) , Судот решил дека бидејќи Турција нема договор за слободна трговија со ЕУ, не смее да има пристап кон пазарот на јавни набавки и заштита на правата.
- Полицијата приведе двајца Пензионирани полициски инспектори кои со години работеле како полициски кртови за криминалната група од скопски Грчец.
- Пензионираните инспектори преку третото лице ја информирале криминалната група за активностите на полицијата во повеќе случаи на убиства, киднапирања и планови на полицијата. Во 2019та полицајците во име на криминалната група дури и му се заканувале на едно лице да го смени исказот а неполна година подоцна ги известиле криминалците дека полицијата ќе прави рација поради што и пропадна големата полициска акција против оваа група во јавноста позната под кодното име Планина.
- Не запреле тука. Наредната година ги информирале криминалците и за двојното убиство во скопски Чаир. Им кажале кој се е приведен, што зборувал во полициска станица и кои инспектори го работат случајот. За сите информации биле дебело платени.
