- Иранската Револуционерна Гарда ги отфрли барањата од мировниот план со 15 точки на Доналд Трамп и претстави свои услови за крај на војната. Иранските барања вклучуваат:
- Затворање на американските воени бази во регионот на Персискиот Залив;
- Целосно укинување на санкциите за Техеран;
- Укинување на ограничувањата на ракетната програма и на нуклеарните активности;
- Запирање на израелските напади врз Хезболах и другите проирански групи во регионот;
- Право на контрола на бродскиот сообраќај низ Ормускиот теснец, вклучувајќи наплаќање такси на бродовите;
- Воени репарации за жртвите и штетата од војната, и
- Гаранции дека во иднина нема да има напади.
- Американски функционер ги нарече барањата од Револуционерната гарда „смешни и нереални“.
- Претходно портпаролот на иранската војска, Ебрахим Золфахари го отфрли предлогот на Трамп и предупреди дека Техран никогаш нема да преговара со САД. „Дали вашите внатрешни конфликти стигнале до точка каде што преговарате сами со себе? Нашиот прв и последен збор е ист од првиот ден и така ќе остане: Некој како нас никогаш нема да се спогоди со некој како вас. Ниту сега, ниту никогаш“.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
