Вести › Набрзинка

Конгресот одобри објавување на документите за Епстин

19 ноември 2025

Двата дома на Конгресот речиси едногласно одобрија да бидат објавени сите документи од истрагата за осудениот педофил Џефри Епстин. Откако претседателот Доналд Трамп денеска ќе ја потпише мерката, илјадниците документи треба да бидат објавени во рок од 30 дена во форма што ќе може да се симне од интернет и да се пребаруваат клучни зборови.
Само еден конгресмен во Претставничкиот дом гласаше против мерката. Републиканецот Клеј Хигинс упорно тврди дека објавувањето е грешка, бидејќи може да ја наруши приватноста на жртвите на Епстин.
„Тоа што беше проблем пред три месеци, проблем е и сега. Ја отфрла 250-годишната правна процедура во САД. Овој закон открива и повредува илјадници невини луѓе - сведоци, лица што дале алиби, членови на семејства... Во оваа форма, општото објавување документи од криминална истрага, може да бидат злоупотребени од злонамерни медиуми и да бидат повредени невини луѓе“, порача Хигинс.

Јавниот обвинител има право да прикрие имиња или цели документи ако оцени дека содржат информации што непотребно ја загрозуваат приватноста. Може да редактира и делови во кои се откриваат техники од истрагата или загрозуваат активни федерални истраги.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор