Вести › Набрзинка

Ќе има покачувања на пензии, ако успееш да доживееш пензија

3 декември 2024

Фискалниот совет предлага зголемување на старосната граница за пензија на 67 години. Овој предлог, којшто е доставен до Собранието, предвидува измената да стапи на сила во 2026 година и да важи и за мажите и жените.
Тоа треба да го намали дефицитот во ПИОМ, исто како и зголемување на придонесите за пензиско и инвалидско осигурување за 0,7 процентни поени во 2026 година. Потоа, доколку состојбите се влошени и во 2027 година, тоа да се зголеми на 21%.
Алармот е одамна вклучен, по укажувањата дека дупката во ПИОМ никако не може да се пополни, па секоја трета пензија мора да се исплаќа од државниот буџет. Сега ситуацијата е дури и полоша. Академик Абдулменаф Беџети за ДВ вели дека сега секој 2,5 пензионер се финансира од државниот буџет а не од пензискиот фонд.

4 декември 2024

Туристите во Италија веќе нема да можат сами да влезат во апартманот што го рентаат преку Ер-биенби, кога клуч им се остава во мал сеф пред врата чија шифра, откако ќе платат, им ја кажува газдата.
Оние што издаваат ќе мора лично и визуелно да го проверат идентитетот на станарот. На властите им е страв од луѓе со терористички намери.
„Живееме во деликатен историски момент на глобално ниво,“изјави првиот полицаец потсетувајќи дека се планирани важни политички, културни и верски настани во пресрет на божиќните празници.

4 декември 2024

Општина Маврово го избришала компјутерскиот систем за даноци на имот.
Не ги урива дивоградбите,
Не наплаќа комуналии за нови викендички,
Не може да донесе нов урбанистички план, зашто нејќе прво да го репрогласи Националниот парк,
Не си ги побарува парите дури и таму кај што треба да наплати,
Троши пари без да распише тендери, утврдил Државниот завод за ревизија (ДЗР). Во 2023 година, општината направила расходи во износ од 1.723.000 денари без поткрепувачка документација, а извршени се набавки на услуги во износ 855.000 денари, за кои не се спроведени постапки за јавна набавка, утврдиле ревизорите.
ДЗР ги повикува надлежните институции да влезат во Општината.